سەناتور: ۇكىمەت سۋمەن قامتۋعا بولىنەتىن قاراجاتتى قاداعالاۋدى كۇشەيتۋ كەرەك

نۇر-سۇلتان. قازاقپارات - پارلامەنت سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى قايرات قوجامجاروۆ ۇكىمەت حالىقتى سۋمەن قامتۋعا بولىنەتىن قاراجاتتى قاداعالاۋدى كۇشەيتۋ كەرەكتىگىن اتاپ ءوتتى، دەپ حابارلايدى قازاقپارات ءتىلشىسى.

«قاراعاندى وبلىسىندا «جايرەم-قاراجال» توپتىق سۋ قۇبىرىنىڭ تارتىلىپ جاتقانىنا 10 جىل بولدى. الايدا جوبالاۋدىڭ دۇرىس بولماي، قۇرىلىستىڭ ساپاسىز جۇرگىزىلۋىنە بايلانىستى ول پايدالانۋعا بەرىلمەگەن. ونىڭ ۇستىنە نىساننىڭ قۇرىلىسى 830 ميلليون تەڭگەدەن 6,7 ميلليارد تەڭگەگە دەيىن، ياعني 8 ەسە قىمباتتاعان. مۇنداي جاعدايلار پاۆلودار وبلىسىندا دا (قۇنى 5,5 ميلليارد تەڭگە سۋ قۇبىرى)، تۇركىستان وڭىرىندە دە (1,5 ميلليارد تەڭگە - ماگيسترال ارناسى)، جامبىل وبلىسىندا دا (550 ميلليون تەڭگە - تالاس سۋ قويماسى مەن ماگيسترالدى ارنا) تىركەلىپ وتىر»، - دەدى قايرات قوجامجاروۆ سەنات وتىرىسىندا.

سەناتور قازاقستان پرەزيدەنتىنىڭ جولداۋى اياسىندا الداعى ءۇش جىلدا حالىقتى سۋمەن قامتۋ ءۇشىن 250 ميلليارد تەڭگە بولىنەتىنىن جەتكىزدى.

«بۇعان قوسا قازاقستاننىڭ 4 وبلىسىنداعى يرريگاتسيالىق جەلىلەردى قالپىنا كەلتىرۋ ءۇشىن 250 ميلليون دوللاردى، ياعني 97 ميلليارد تەڭگەنى ۇكىمەتتىڭ كەپىلىمەن ازيا دامۋ بانكى بەرىپ وتىر. وسى قاراجات ارنالاردى تازارتۋعا، جوندەۋگە، سۋ تارتۋعا، 4 مىڭعا تارتا گيدروتەحنيكالىق قۇرىلىمداردى قايتا جوندەۋگە جۇمسالادى. بۇل رەتتە ۇكىمەت سۋمەن قامتۋعا بولىنەتىن قاراجاتتى قاداعالاۋدى كۇشەيتۋ كەرەك»، - دەدى قايرات قوجامجاروۆ.