پرەزيدەنتتىڭ جەر تۋرالى تاپسىرمالارىنا «اۋىل» پارتياسى قولداۋ ءبىلدىردى
«اۋىلدىق جەردەگى ەڭبەكتىڭ شىن باعاسىن زالدا وتىرعان شارۋاشىلىق وكىلدەرى، سىزدەر، بىلەسىزدەر! ونى اۋىل شارۋاشىلىعىنا ۇنەمى كوڭىل بولەتىن ەلباسىمىز نۇرسۇلتان نازاربايەۆ بىلەدى. اۋىلداعى ەڭبەكتىڭ باعاسىن ءوزىنىڭ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا اگروونەركاسىپتىڭ دامۋى مەن 7 ميلليون 700 مىڭ اۋىل تۇرعىندارىنىڭ ءومىر شارتتارىنا ەرەكشە نازار اۋدارعان پرەزيدەنتىمىز قاسىم-جومارت توقايەۆ بىلەدى»، - دەدى ءالي بەكتايەۆ «اۋىل» حالىقتىق-دەموكراتيالىق پاتريوتتىق پارتياسىنىڭ XVI ەسەپ بەرۋ-سايلاۋ سەزىندە.
مەملەكەت باسشىسى ءوز جولداۋىندا «جەر رەسۋرستارىن ءتيىمسىز پايدالانۋ ماسەلەسى وتە وزەكتى بولىپ وتىر. جەرگە سالىناتىن تىكەلەي سالىقتار دەڭگەيىنىڭ تومەندىگى جاعدايدى كۇردەلەندىرە ءتۇستى. مەملەكەتتەن جەردى تەگىن جالعا الۋ قۇقىعىنا يە بولعانداردىڭ كوپشىلىگى جەردى يگەرمەي، بوسقا ۇستاپ وتىر. ەلىمىزدە «ءشوپ قورىعان ءيتتىڭ» كەبىن كيگەن «لاتيفۋنديستەر» كوبەيىپ كەتتى. پايدالانىلماي جاتقان اۋىل شارۋاشىلىعى جەرلەرىن قايتارىپ الاتىن كەز كەلدى. جەر - ءبىزدىڭ ورتاق بايلىعىمىز جانە ونى كىم يگەرسە، سوعان تيەسىلى بولۋى ءتيىس» دەپ تايعا تاڭبا باسقانداي ەتىپ اتاپ كورسەتتى.
«اۋىل» پارتياسى پرەزيدەنتتىڭ بۇل تاپسىرماسىن تولىقتاي قولدايدى.
«بۇل اۋىل شارۋاشىلىعى ءۇشىن ومىرلىك ماڭىزى بار شەشىم. پارتيانىڭ وڭىرلىك فيليالدارى بۇل ماسەلەدە قىراعىلىق تانىتىپ، جەرگىلىكتى اتقارۋشى ورگانداردىڭ الدىنا ناقتى ماسەلەلەر قويىپ وتىرۋى كەرەك. ەلدى تولىققاندى جاڭعىرتۋعا باعىتتالعان تاپسىرمالاردى جۇزەگە اسىرۋدا اۋىل مەن اگرووندىرىستىك كەشەن ماڭىزدى ورىن الادى. اگرووندىرىستىك كەشەننىڭ ءتيىمدى جۇيەسىن قالىپتاستىرۋدا ۇكىمەت كەيىنگى جىلدارى تالاي اۋقىمدى ىستەردىڭ باسىن قايىردى»، - دەدى پارتيا ءتوراعاسى.
ايتا كەتەيىك، ەلوردادا «اۋىل» حالىقتىق-دەموكراتيالىق پاتريوتتىق پارتياسىنىڭ XVI ەسەپ بەرۋ-سايلاۋ سەزى باستالدى.
سەزد جۇمىسى اياسىندا پارتيانىڭ ءتوراعاسى سايلانىپ، ساياسي كەڭەستىڭ جاڭا قۇرامى بەكىتىلەدى جانە پارتيا جارعىسىنا وزگەرتۋلەر مەن تولىقتىرۋلار ەنگىزىلەدى.
