ەل الدىندا قۇراندى ورتەپ جىبەرگەن بەلسەندى حالىقارالىق داۋ تۋعىزدى

نۇر-سۇلتان. قازاقپارات - ەل الدىنا شىعىپ مۇسىلمانداردىڭ قاسيەتتى كىتابىن ورتەپ جىبەردى.

ونىڭ ارتى حالىقارالىق داۋعا ۇلاسقان. بەلسەندىنىڭ بۇل ارەكەتى پاكىستان قوعامىنىڭ شامىنا تيگەن. ناتيجەسىندە پاكىستاننىڭ سىرتقى ىستەر ءمينيسترى وزىنە نورۆەگيانىڭ ەلشىسىن شاقىرتقان دەپ حابارلايدى KAZ. NUR. KZ.

بولعان وقيعا جايلى Gulf News باسىلىمى حابارلاعان.

19-قاراشادا «نورۆەگياداعى يسلاميزاتسيانى توقتاتامىز» (SIAN) قوزعالىسىنىڭ كوشباسشىسى لارس تورسەن قولىنا قۇراندى الىپ، ونى جاعىپ جىبەرگەن. بۇل بىرنەشە كۋاگەرلەردىڭ كوزىنشە بولعان.

وسىدان كەيىن بەلسەندىگە يسلام مەملەكەتىنىڭ بىرنەشە وكىلى شابۋىل جاساعان. قۇقىق قورعاۋ ورگاندارى ەر ادامداردىڭ ءبىرىن ۇستاپ العان. قازىرگى ۋاقىتتا ول قاماۋدا وتىر.

عالامتوردا قاسيەتتى جازۋدى قورعاعان ەر ادامدى قاماۋدان بوساتۋعا شاقىراتىن ارنايى پەتيتسيا جاسالدى. ونلاين قۇجاتتا كەيبىرەۋلەردىڭ دىنگە كەلىسپەۋىنە بولاتىنى، الايدا قۇراندى قورلاۋعا ەشكىمنىڭ قۇقىعى جوق ەكەنى كورسەتىلگەن.

سونداي-اق، پەتيتسيادا بىرەۋدىڭ كىتاپتى ورتەپ جاتقانىنا يمميگرانتتىڭ وسىنداي رەاكسيا تانىتقانى تاڭقالارلىق ەمەستىگى ايتىلعان.

ودان بولەك، نورۆەگيالىق ازاماتتىڭ ارەكەتىنەن كەيىن پاكىستاننىڭ سىرتقى ساياسات ۆەدومستۆوسى ەۋروپالىق ەلدىڭ ەلشىسىمەن سويلەسىپ، ەل ازاماتتارىنىڭ مۇنداي ارەكەتكە بارۋىنا جول بەرمەۋىن سۇراعان.

س ءى م بەلسەندىنىڭ جەر بەتىندەگى 1,3 ميلليارد مۇسىلمانداردىڭ، ونىڭ ىشىندە پاكىستان حالقىنىڭ سەنىمىنە نۇقسان كەلتىرگەنىن اتاپ ءوتتى.

مۇنداي ارەكەتتىڭ - جەكە كوزقاراستى ەركىن بىلدىرۋمەن ەش بايلانىسى جوق ەكەنى دە ايتىلعان.