عالىمدار قورقىنىشتى تۇستەردىڭ پايداسىن انىقتادى

نۇر-سۇلتان. قازاقپارات - جەنيەۆا ۋنيۆەرسيتەتىنىڭ عالىمدارى امەريكالىق ارىپتەستەرىمەن بىرلەسىپ، قورقىنىشتى تۇستەردىڭ ادامنىڭ جۇيكە جۇيەسىن «جاتتىقتىرۋعا» كومەكتەسەتىنىن انىقتادى.

ناتيجەسىندە ادام شىنايى ومىردەگى كۇيزەلىس جاعدايلارىنا ءتوزىمدى بولا تۇسەدى ەكەن دەپ حابارلايدى گازەتا. ru.

عالىمداردىڭ سايكەس زەرتتەۋلەرى Human Brain Mapping جۋرنالىندا جاريالاندى.

ماماندار ناۋقاستاردى مازاسىزدانۋدان ارىلتۋ ءۇشىن تەراپيالىق ءتاسىل رەتىندە تۇسكە جۇگىنۋگە بولاتىنىنا سەنىمدى.

ولار جۇرگىزگەن عىلىمي تاجىريبەگە 18 ادام قاتىسقان. ساراپشىلار ەلەكترو ەنتسەفالوگرامما ارقىلى ۇيقى كەزىندەگى ميدىڭ ءارتۇرلى بولىكتەرىنىڭ بەلسەندىلىگىن انىقتادى.

ساراپتاما ناتيجەسىندە بەلگىلى بولعانداي، ۇيقى كەزىندەگى قورقىنىش سەزىمىنە ميدىڭ ارالىق قابىعى مەن الدىڭعى بەل قىرتىسى جاۋاپتى ەكەن.

سونىمەن قاتار، ميدىڭ ارالىق قابىعى ۇيقىدان ويانۋ كەزىندەگى ەموتسيانى باعالاۋعا ىقپال ەتەدى جانە قورقىنىش سەزىمى بولعاندا جۇيەلى تۇردە ىسكە قوسىلادى. ال الدىڭعى بەل قىرتىسى اعزانى قاۋىپتەرگە ارەكەت ەتۋگە دايىندالۋعا كومەكتەسەدى.

ەكىنشى عىلىمي تاجىريبەگە 89 ادام قاتىسقان. سونىڭ ناتيجەسىندە ماماندار ادامنىڭ ۇيقى كەزىندە قورقىنىشى نەعۇرلىم ۇلكەن بولعان سايىن، ارالىق قابات پەن بەل قىرتىسىنىڭ بەلسەندىلىگى سوعۇرلىم تومەندەيتىنىن انىقتادى.

وسىلايشا، عالىمدار ادامنىڭ تۇسىندەگى جانە وڭىندەگى ەموتسيالارىنىڭ بايلانىسىن اتاپ ءوتتى.