الا ءجىپ، كوك ءشوپ، توق ىشەك: بالانىڭ تۇساۋىن نەمەن كەسكەن دۇرىس

نۇر-سۇلتان. قازاقپارات - تۇساۋكەسەر - نارەستە قادام باساتىن ۋاقىتتا ورىندالاتىن ءداستۇر. ەل اراسىندا «تۇساۋى كەسىلمەگەن بالا سۇرىنشەك بولادى» دەگەن تۇسىنىك قالىپتاسقان.

سول سەبەپتى اتا-بابالارىمىز بالانىڭ العاشقى قادامىنا ايرىقشا ءمان بەرگەن. قازىرگى ۋاقىتتا وسى ءراسىمدى ورىنداۋ بارىسىندا تۇسىنبەۋشىلىكتەر ورىن الىپ ءجۇر.

وسىعان بايلانىستى KAZ. NUR. KZ پورتالى «بالانىڭ تۇساۋىن نەمەن كەسكەن دۇرىس؟» دەگەن سۇراققا جاۋاپ ىزدەپ كوردى.

بايىرعى ۋاقىتتا باي-باعلاندار بالاسىنىڭ العاشقى قادامىن ەرەكشە وتكىزۋ ماقساتىندا كوكپار تارتقىزىپ، ۇلتتىق ويىنداردان جارىس ۇيىمداستىرعان.

قازىرگى ۋاقىتتا دا تۇساۋكەسەر تويلارى دا جوعارى دەڭگەيدە اتاپ وتىلۋدە.

ەل اراسىندا «وسى ءراسىمدى قالاي ورىنداعان دۇرىس؟»، «الا ءجىپ، كوك ءشوپ، توق ىشەكتىڭ قايسىسىن قولدانعان ءجون» دەگەن سۇراقتار تۋىنداپ ءجۇر.

قازاق ءسابيدىڭ تۇساۋىن «كوبەيىپ، كوگەرە بەرسىن» دەپ كوك شوپپەن، «باي بولسىن، توق بولسىن» دەگەن تىلەكپەن مالدىڭ توق ىشەگىمەن كەسكەن.

كوبىنەسە «بىرەۋدىڭ الا ءجىبىن اتتاماسىن، وزگەنىڭ مال-مۇلكىنە، دۇنيەسىنە كوز تىكپەسىن، قول سۇقپاسىن» دەگەن تىلەكپەن اق پەن قارا ءجىپتى ايقاستىرا وتىرىپ، الا جىپپەن وسى ءراسىمدى ورىنداعان.

ايتا كەتەتىن جاعداي، بالانىڭ تۇساۋىن ءبىر-اق رەت كەسەتىندىكتەن، وسى ۇشەۋىنىڭ بىرەۋىن عانا قولدانعان ءجون.