توقايەۆتىڭ قىرعىزستانعا ساپارى: بىشكەك الاڭىندا نە بولىپ جاتىر؟

نۇر-سۇلتان. قازاقپارات - كەشە بىشكەكتىڭ ورتالىق الاڭىندا جاپپاي بەيبىت ميتينگ ءوتتى - نارازىلىق اكسياسى ءبىر جارىم ساعاتقا سوزىلىپ، كەيىن جينالعاندار تاراپ كەتتى.

قازاقستان پرەزيدەنتى قاسىم-جومارت توقايەۆتىڭ بىشكەككە ساپارى قارساڭىندا ءبىز قالاداعى جاعدايدى ءبىلىپ قايتۋعا تىرىستىق دەپ حابارلايدى KAZ. NUR. KZ.

نارازىلىق اكسيالارى بىشكەكتىڭ ورتالىعىنداعى الا-توو الاڭىندا ءوتتى. وعان شامامەن 300 ادام قاتىستى.

بۇگىن اتالعان الاڭ بوس تۇر. ايكول ماناس ەسكەرتكىشىنىڭ جانىندا قاراۋىل مەن بىرنەشە تۋريستى كورۋگە بولادى. مۇندا تىنىش بولعانى سونشالىق، جاقىن ماڭداعى ساياباقتان قۇستاردىڭ داۋىستارى ەستىلەدى.

الاڭ اۋماعى بەلسەندى تۇردە تازارتىلۋدا. اينالاسىنا قورشاۋلار قويىلىپ، ءتارتىپ ساقشىلارى كەزەكشىلىك جۇرگىزۋدە. الاڭعا كەدەرگىسىز كىرۋگە بولادى.

بىشكەكتىڭ ورتالىعىندا ورنالاسقان لەنين ەسكەرتكىشى ماڭىندا اۋلا تازارتۋشىلار ءجۇر. ولاردىڭ جۇمىسى شاش-ەتەكتەن، سەبەبى، كەشە قىرعىزستان استاناسىندا قالىڭ قار جاۋعان بولاتىن.

ءبىز كەشەگى ميتينگ قاتىسۋشىلارىنىڭ باعدارى بويىنشا اق ءۇي عيماراتىنا قاراي بەتتەدىك. وندا پرەزيدەنتتىڭ اپپاراتى مەن ءىس باسقارماسى ورنالاسقان. مەكەمە الدىندا دا بارلىعى تىنىش.

وسى كەزدە بىشكەكتە توقايەۆ پەن ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردى قارسى الۋعا دايىندىق ءجۇرىپ جاتىر. قالاداعى باستى كوشەنىڭ بويىنا قازاقستان، رەسەي، بەلارۋس جانە وزگە ەلدەردىڭ تۋلارى ىلىنگەن.

توقايەۆتىڭ بىشكەككە مەملەكەتتىك ساپارى 27- قاراشادا باستالادى - مەملەكەت باسشىسى قىرعىزستان پرەزيدەنتىمەن كەزدەسەدى، سونداي-اق ۇ ق ش ۇ وتىرىسىنا قاتىسادى.

قىرعىز ساراپشىلارىنىڭ مالىمدەۋىنشە، بىشكەكتەگى ميتينگىلەر مەملەكەت باسشىلارىنىڭ ساپارىمەن بايلانىستى ەمەس. جينالعاندار ەلدەگى سىبايلاس جەمقورلىققا قارسى نارازىلىق بىلدىرگەن.