ۇلتتىق مۋزەيدە ەلباسى كىتاپحاناسىنىڭ جيناعىنان جاساقتالعان كورمە اشىلدى

نۇر-سۇلتان. قازاقپارات - بۇگىن قازاقستان رەسپۋبليكاسى ۇلتتىق مۋزەيىندە ەلباسى كىتاپحاناسىنىڭ جيناعىنان جاساقتالعان «ەلباسى جانە مادەنيەت» كورمەسىنىڭ تۇساۋكەسەرى ءوتتى، دەپ حابارلايدى قازاقپارات.

تۇڭعىش پرەزيدەنت كۇنىنە ورايلاستىرىلعان كورمەگە قازاقستاندىق قوعام قايراتكەرلەرى، ولاردىڭ ىشىندە يگور روگوۆ، قۋانىش سۇلتانوۆ، دارحان مىڭباي، ازات پەرۋاشەۆ جانە شەتەلدىك ەلشىلىك وكىلدەرى قاتىستى.

اتالمىش كورمە كوپ ۇلتتى قازاقستان حالقىنىڭ رۋحاني قۇندىلىقتارىن جاھاندىق دەڭگەيدە ىلگەرىلەتۋدە، مادەنيەتتى قايتا جاڭعىرتۋدا ەلباسى ن. ءا. نازاربايەۆتىڭ ءرولىن بەينەلەۋدى كوزدەيدى.

«بۇگىنگى قازاقستان رەسپۋبليكاسىنىڭ ۇلتتىق مۋزەيىمەن بىرلەسە اشىلعالى وتىرعان «ەلباسى جانە مادەنيەت» كورمەسىنىڭ ەلىمىزدىڭ مادەني ومىرىندە ەلەۋلى وقيعا بولاتىنىنا سەنىمدىمىن! وتكەنگە كوز جۇگىرتسەك، ەلىمىز ەگەمەندىك العان بويدان باستاپ ءوزىنىڭ تاريحي جاڭعىرۋ جانە دامۋ كەزەڭدەرىن باستان كەشىردى. تاۋەلسىزدىككە قول جەتكىزگەننەن كەيىن، اسىرەسە، ەگەمەندىگىمىزدىڭ العاشقى ون جىلدىعى ۇلت مادەنيەتى ءۇشىن جاڭا كەزەڭ بولدى. رۋحانياتىمىز قايتا تۇلەپ، تاريح تاساسىندا قالعان بارلىق مۇرالارىمىز ەلباسى باستاماسىمەن حالقىمىزعا ورالا باستادى. تۇڭعىش پرەزيدەنتىمىز ۇسىنعان «مادەني مۇرا» مەملەكەتتىك باعدارلاماسىنىڭ ءتيىمدى ورىندالۋى ناتيجەسىندە رۋحاني باي مۇرالارىمىز زەردەلى ۇرپاقتىڭ زەيىنىن اشىپ، كونە تاريحتى قايتا جاڭعىرتتى»، - دەپ ءىس-شارانىڭ اشىلۋ راسىمىندە ەلباسى كىتاپحاناسىنىڭ ديرەكتورى ءامىرحان راحىمجانوۆ اتاپ ءوتتى.

ودان سوڭ ق ر ۇلتتىق مۋزەيىنىڭ ديرەكتورى ارىستانبەك مۇحامەدي ۇلى: «بۇگىن تۇڭعىش پرەزيدەنت كۇنىنە ارنالعان سالتاناتتى شارانىڭ ءبىزدىڭ ۇلتتىق مۋزەيدە ءوتىپ جاتقانىنا وتە قۋانىشتىمىز. ءبىز قازاقستان رەسپۋبليكاسىنىڭ تۇڭعىش پرەزيدەنتى - ەلباسى كىتاپحاناسىنىڭ باسشىلىعىنا نۇرسۇلتان ءابىش ۇلى نازاربايەۆتىڭ يدەيالارى مەن باستامالارىن ساقتاۋعا، كەڭىنەن تاراتۋعا باعىتتالعان ءىس-شارالارى ءۇشىن، وسى كورمەگە، ەلىمىزدىڭ تاۋەلسىزدىك تاريحى تۋرالى باياندايتىن بىرەگەي ەكسپوناتتار ۇسىنعانى ءۇشىن ۇلكەن العىسىمىزدى بىلدىرەمىز»، - دەدى.

ەلباسى كىتاپحاناسىنىڭ «ەلباسى جانە مادەنيەت» اتتى كورمەسى قازاقستان رەسپۋبليكاسىنىڭ ساۋلەتى مەن كينو ونەرى، قولدانبالى جانە بەينەلەۋ ونەرى، مۋزەي، تەاتر، ارحيۆ، كىتاپحانا سالاسى، تاۋەلسىزدىك جىلدارىنداعى مادەنيەت سالاسىنىڭ مەملەكەتتىك ساياساتى، تاريحي-مادەني ەسكەرتكىشتەردى قورعاۋ سالاسى سياقتى باعىتتاردىڭ نەگىزىندە ەلباسى كىتاپحاناسى ارحيۆىنىڭ 170 تەن استام ماتەريالىن ۇسىنادى.

اتالمىش كورمە 2020-جىلدىڭ 5- قاڭتارىنا دەيىن جالعاسادى.