تۇركىستان قالاسى بولاشاقتا قالاي وزگەرەدى؟

تۇركىستان. قازاقپارات - تۇركىستان قالاسىنىڭ اكىمى راشيد ايۋپوۆ بۇقارالىق اقپارات قۇرالدارى وكىلدەرى مەن الەۋمەتتىك جەلى بەلسەندىلەرىمەن كەزدەسىپ، اتقارىلىپ جاتقان جۇمىستار بارىسىن باياندادى، دەپ حابارلايدى قازاقپارات ءتىلشىسى.

قالا باسشىسىنىڭ سوزىنە قاراعاندا، بۇگىندە وبلىس ورتالىعىندا حالىق سانى 170 مىڭعا جەتكەن. الداعى بەس جىلدىقتا بۇل كورسەتكىش ەكى ەسەگە دەيىن ۇلعايىپ، حالىق سانى 350 مىڭعا جەتەدى دەپ جوسپارلانىپ وتىر.

ال، كيەلى شاھاردا تۋريستەردى تاڭقالدىرۋ ماقساتىندا تىڭ جوبالاردى قولعا الۋ قاراستىرىلۋدا ەكەن. ماسەلەن، قوجا احمەت ياساۋي كەسەنەسى ماڭىندا ەرەكشە جوبا جاسالماق. «2050-جىلى تۇركىستان قالاسى الەمدەگى 3 قالاعا ۇقساۋى كەرەك دەدىك. ولار ىستانبۇل، يەرۋساليم، ريم قالالارى. وسى ءۇش قالانىڭ بىرەۋىنە تەڭەستىرۋىمىز كەرەك. ول ءۇشىن قانشا ينفراقۇرىلىم كەرەك، قانشا جۇمىس اتقارىلۋى قاجەت. ءبىلىمىمىزدى كوتەرىپ، كوپ دايىندىقتار جۇرگىزۋىمىز قاجەت. قانشا دەمالاتىن ورىندا پايدا بولۋى كەرەك. امەريكانىڭ تانىمال ءارى ساۋلەت جاعىنان وتە مىقتى كومپانياسىمەن كەلىسىمگە كەلىپ، قوجا احمەت ياساۋي كەسەنەسى ماڭىنان ۇلكەن جوبالار جاساپ جاتىر. سىزدەرگە شەت جاعاسىن ايتايىن، الداعى ۋاقىتتا كەسەنەگە قايىقپەن قاتىناۋ جولدارى سالىنادى»، - دەدى راشيد ايۋپوۆ.

شاھار باسشىسى سونىمەن قاتار، ب ا ق وكىلدەرى مەن الەۋمەتتىك جەلى بەلسەندىلەرىن تولعاندىرعان سۇراقتارعا جاۋاپ بەرىپ، الداعى جوسپارلارىمەن ءبولىستى.