ۋ ە ف ا چەمپيوندار ليگاسى: بىرنەشە كوماندا پلەي-وفف كەزەڭىنە شىقتى
العاشقى كۇننىڭ باستى ويىنى يسپانيادا «ا» توبىنىڭ «رەال مادريد» جانە «پسج» اراسىنداعى كەزدەسۋى بولدى. مادريدتىكتەر پاريجدەگى ويىندا 3:0 ەسەبىمەن ويسىراي جەڭىلگەندىكتەن، بۇگىن سول كەتكەن ەسەسىن قايتارىپ، پسيحولوگيالىق جاعىنان بەكىپ الماق بولعانى بايقالدى. كارىم بەنزەمانىڭ 17, 79-مينۋتتاردا سوققان قوس گولىنان كەيىن شىنىمەن ەسە قايتاراتىنداي-اق كورىنىپ ەدى. ءبىراق يسپاندار قولدا تۇرعان جەڭىسىن ۇستاپ قالا العان جوق. ەكى مينۋتتا ەكى گول سوققان قوناقتار ەسەپتى تەڭەستىرىپ، ويىن 2:2 ەسەبىمەن اياقتالدى.
«ا» توبىنىڭ بۇعان دەيىن وتكەن ويىنىندا ىستانبۇلدىڭ «گالاتاسارايى» بريۋسسەلدىڭ «بريۋگگەسىمەن» تەڭ ويناعان بولاتىن. سوندىقتان توپتىق كەزەڭ اياقتالارعا 1 تۋر قالعاندا، «پ س ج» 13، «رەال مادريد» 8 ۇپايمەن كەلەسى اينالىمعا جولداما الدى. «بريۋگگە» 3 ۇپايمەن ءۇشىنشى ورىندا كەلەدى، ال تۇرىكتەر 2 ۇپايمەن سوڭعى ورىندا قالىپ وتىر.
«ۆ» توبىندا «باۆاريا» «تسرۆەنا زۆەزداعا» جاۋاپسىز 6 گول سوقتى. ميۋنحەن ۇجىمى وتكەن تۋردا-اق كەلەسى اينالىمعا شىققان. قازىر ولار 15 ۇپايمەن ءبىرىنشى ورىنعا نىق جايعاستى. ال كەشە عانا باپكەرىن الماستىرعان لوندوننىڭ «توتتەنحەمى» ءوز الاڭىندا «وليمپياكوستى» قابىلداپ، 4:2 ەسەبىمەن جەڭىسكە جەتتى. جوزە موۋرينو شاكىرتتەرى 10 ۇپايمەن كەلەسى اينالىمعا جولداما الدى. «تسرۆەنا زۆەزدادا» 3، «وليمپياكوستا» 1 ۇپاي بار.
«س» توبىندا «مانچەستەر سيتي» ءوز الاڭىندا دونەتسكىنىڭ «شاحتەرىن» قابىلداپ، 1:1 ەسەبىندە تەڭ وينادى. «دينامو زاگرەب» «اتالانتادان» جەڭىلگەندىكتەن، 11 ۇپايمەن «سيتي» كەلەسى اينالىمعا جولداما الدى. «شاحتەردا» 6، «دينامودا» 5، «اتالانتادا» 4 ۇپاي بار. سوڭعى تۋردا وسى ءۇش كوماندا كەلەسى اينالىمعا شىعۋ ءۇشىن قيان-كەسكى كۇرەس جۇرگىزسە تاڭعالماس ەدىك.
«د» توبىندا «يۋۆەنتۋس» كەلەسى اينالىمعا شىعۋ ماسەلەسىن وتكەن تۋردا وڭدى شەشكەن بولاتىن. ماۋريتسيو سارري شاكىرتتەرى ءوز الاڭىندا «اتلەتيكو ءمادريدتى» 1:0 ەسەبىندە جەڭىپ، ۇپايى سانىن 13 كە جەتكىزدى. مادريد كومانداسىندا قازىر 7 ۇپاي بار. ماسكەۋدە «لوكوموتيۆتى» 0:2 ەسەبىمەن جەڭگەن ليەۆەركۋزەننىڭ «بايەرى» 6 ۇپايمەن مادريدتىكتەردى وكشەلەپ كەلەدى. «لوكو» 3 ۇپايمەن سوڭعى ورىندا قالىپ قويدى.
ايتا كەتەيىك، 5-تۋردىڭ قالعان 8 ويىنى بۇگىن وتەدى.
