جاپونيادا قان تامشىسى ارقىلى راك دەرتىن انىقتايتىن ءتاسىل ويلاپ تابىلدى
Toshiba ۇيىمى وبىر دەرتىنىڭ 13 ءتۇرىن 99 پايىزدىق دۇرىس جۋىقتىقپەن انىقتايتىن تەست ويلاپ تاپتى. بۇعان تەك ادامنىڭ ءبىر تامشى قانى جەتكىلىكتى كورىنەدى. اتالعان ءتاسىل ارقىلى راك دەرتىن ونىڭ باستاپقى فازاسىندا ايقىنداۋعا بولادى ەكەن.
«باسقا ۇيىمدار جاساپ شىعارعان تاسىلدەرگە قاراعاندا ءبىزدىڭ تەست ۋاقىت جانە اقشا ۇنەمدەۋگە، بۇعان قوسا قاتەرلى ىسىكتى ءدال انىقتاۋعا جاعداي جاسايدى»، - دەدى Toshiba زەرتحاناسىنىڭ جەتەكشىسى كودجي حاسيموتو.
بۇل ءتاسىلدىڭ كومەگىمەن اسقازان، وڭەش، وكپە، باۋىر، ءوت قابى، ۇيقىبەز، ىشەك جولدارى، جىنىس بەزدەرى مەن مۇشەلەرىنىڭ، قۋىق پەن ءسۇت بەزى، بۇعان قوسا ساركوما جانە گليومانىڭ وبىر دەرتىنە ۇشىراعاندىعىن انىقتاۋعا بولادى ەكەن.
بۇل تەستكە بار جوعى 2 ساعات ۋاقىت كەتەدى ەكەن، ال ونىڭ باعاسى 180 دوللاردى قۇرايدى. ۇيىم باسشىلىعىنىڭ سوزىنشە، الداعى ۋاقىتتا بۇل ءتاسىل سىناقتان وتكىزىلەتىن بولادى، ال كەلەر جىلى قولدانىسقا ەنگىزىلەدى ەكەن.
