نۇرسۇلتان نازاربايەۆتىڭ سىرتقى ساياسي ستراتەگياسىنىڭ ساباقتاستىعى ساقتالادى - پرەزيدەنت توقايەۆ
«قۇرمەتتى حانىمدار مەن مىرزالار! ستراتەگيالىق ماڭىزى زور ماقساتتارعا قول جەتكىزۋ ءۇشىن سىرتقى جاعدايلار دا قولايلى بولۋى كەرەك. تۇڭعىش پرەزيدەنتىمىزدىڭ ساليقالى ساياساتىنىڭ ارقاسىندا ەلىمىز حالىقارالىق الاڭدا لايىقتى ورىن الدى. مەملەكەتىمىز جاھاندىق جاعدايعا بەيىمدەلدى. 2019 -جىل حالىقارالىق دەڭگەيدەگى كوپتەگەن تابىستى كەزدەسۋلەرگە دە تولى بولدى. مەن سىندارلى ىنتىماقتاستىقتى نىعايتۋ ماقساتىندا رەسەيگە، وزبەكستانعا، قىتايعا رەسمي ساپارمەن باردىم. جىل سوڭىنا دەيىن قىرعىزستان مەن گەرمانياعا ساپارلارىم جوسپارلانىپ وتىر»، - دەدى پرەزيدەنت قازاقستاندا اككرەديتتەلگەن شەت ەلدەردىڭ ديپلوماتيالىق ميسسيالارىنىڭ باسشىلارىمەن كەزدەسۋدە.
سونىمەن بىرگە، مەملەكەت باسشىسى شاڭحاي ىنتىماقتاستىق ۇيىمىنىڭ، ازياداعى ءوزارا ءىس- قيمىل جانە سەنىم شارالارى جونىندەگى كەڭەستىڭ، ەۋرازيالىق ەكونوميكالىق وداقتىڭ، تاۋەلسىز مەملەكەتتەر دوستاستىعىنىڭ سامميتتەرىنە قاتىسقانىن اتاپ ءوتتى. بىرىككەن ۇلتتار ۇيىمى باس اسسامبلەياسىنىڭ 74-سەسسياسىنا قاتىسىپ، ءسوز سويلەپ، سونىڭ اياسىندا ءبىرقاتار ەلدىڭ باسشىلارىمەن كەلىسسوزدەر جۇرگىزدى.
بيىل قازاقستانعا رەسمي ساپارمەن كورەيا رەسپۋبليكاسى، گرۋزيا، ارمەنيا، موڭعوليا، بەلارۋس جانە شۆەيتساريانىڭ مەملەكەت جانە ۇكىمەت باسشىلارى كەلدى. وسى ساپارلار مەن كەزدەسۋلەر ءوزارا ىقپالداستىقتىڭ نەگىزگى باعىتتارىن ايقىنداۋعا جاقسى مۇمكىندىك تۋدىردى.
«ەرەكشە اتاپ وتكىم كەلەتىنى، ەلباسى نۇرسۇلتان نازاربايەۆتىڭ سىرتقى ساياسي ستراتەگياسىنىڭ ساباقتاستىعى ساقتالادى جانە ودان ءارى دامي تۇسەدى. ەلباسى - مەملەكەتىمىزدىڭ نەگىزىن قالاۋشى، زامانىمىزدىڭ كورنەكتى ساياساتكەرى. ول جاھاندىق انتيادرولىق قوزعالىسقا، حالىقارالىق قاۋىپسىزدىكتى نىعايتۋعا ولشەۋسىز ۇلەس قوستى»، - دەدى قاسىم- جومارت توقايەۆ.
اۆتور: ايجان سەرىكجان قىزى
