ماۋلەن اشىمبايەۆ: قازاق پەن قىرعىزعا ورتاق تۇلعالار تۋرالى فيلمدەر تۇسىرگەن ءجون
«بۇگىنگى فورۋمدا زيالىلارىمىزدىڭ ءوزارا بايلانىسىن ءارى قاراي دامىتۋدىڭ جولدارىن تالقىلاۋعا نيەتتەنىپ وتىرمىز. بۇل باعىتتا بىرنەشە جوبانى بىرلەسە جۇزەگە اسىرۋعا بولار ەدى. ەڭ الدىمەن، عالىمدار مەن ماماندارعا ورتاق عىلىمي- زەرتتەۋ جۇمىستارىن جۇيەلى جۇرگىزۋ ءۇشىن مۇمكىندىكتەر جاساعان دۇرىس بولار ەدى دەپ سانايمىز. بۇل عىلىمي الەۋەتىمىزدى ارتتىرۋعا سەپتىگىن تيگىزەدى.
مادەني مۇرامىزدى، تەرەڭ تاريحىمىزدى دارىپتەيتىن دە بىرلەسكەن جوبالار قاجەت. مىسالى، قازاق پەن قىرعىزعا ورتاق تۇلعالار تۋرالى تانىمدىق كىتاپتار شىعارىپ، فيلمدەر تۇسىرگەن ءجون»، - دەدى م. اشىمبايەۆ بىشكەكتە قازاق- قىرعىز زيالىلارىنىڭ IV فورۋمىندا.
سونىمەن قاتار ق ر پرەزيدەنتىنىڭ كومەكشىسى زيالى قاۋىم وكىلدەرى جاستارىمىزدىڭ تىعىز بايلانىستا بولۋىن ناسيحاتتاۋى كەرەك ەكەنىن اتاپ ءوتتى.
«جاستار ەكى ەلدىڭ ىنتىماقتاستىعىن جالعاستىرۋى ءتيىس. ءوزارا ستۋدەنت الماسۋ تاجىريبەسىن ءارى قاراي دامىتقان ورىندى دەپ سانايمىز. مۇنداي باستاماعا جوعارى وقۋ ورىندارى بەلسەنە اتسالىسقانى ابزال.
عالىمدارىمىز بەن وقىتۋشىلارىمىز تۇراقتى تۇردە ءبىر- ءبىرىمىزدىڭ ۋنيۆەرسيتەتتەرىمىزگە كەلىپ، ءدارىس وقىسا دا ارتىق ەتپەيدى. سونداي- اق، باسپا سوزدە، عىلىمي باسىلىمداردا ەكى ەلدىڭ دە اۆتورلارى ءوز ماقالالارىن جاريالاپ وتىرعانى ءجون دەپ ويلايمىز. بۇل ەكى ەلدىڭ زيالى قاۋىم وكىلدەرىنىڭ ۇستانىمىن تەرەڭىرەك تۇسىنۋگە مۇمكىندىك بەرەتىنى ءسوزسىز. جالپى، ەكى حالىقتى ءارى قاراي جاقىنداستىرا تۇسەتىن باسقا دا جوبالاردى جۇزەگە اسىرۋعا بولار ەدى. وسىندا باس قوسقان ازاماتتار وسى ويلاردى جالعاستىرىپ، فورۋم تاقىرىبىنا قاتىستى تىڭ پىكىرلەر ايتادى دەپ ويلايمىن»، - دەدى ماۋلەن اشىمبايەۆ.
بۇدان بۇرىن حابارلانعانداي، بىشكەكتە «بەكەم باۋىرلاستىق بايلانىستار» تاقىرىبىندا وتكەن فورۋمدا حالىقارالىق تۇركى اكادەمياسى باسىپ شىعارعان ءۇش جاڭا كىتاپتىڭ تۇساۋكەسەر ءراسىمى ءوتتى.
سونىمەن قاتار بۇگىنگى جيىندا م. اشىمبايەۆ ەكى ەل زيالى قاۋىم وكىلدەرى ءجيى كەزدەسىپ تۇرسا، ءتۇرلى سالاداعى ىنتىماقتاستىعىمىز ارتا تۇسەتىنىن ءمالىم ەتتى.
اۆتور رۋسلان عابباسوۆ
