بىشكەكتە تۇركى اكادەمياسى باسىپ شىعارعان كىتاپتاردىڭ تۇساۋكەسەرى ءوتتى
وسى جولعى جيىن «بەكەم باۋىرلاستىق بايلانىستار» تاقىرىبىنا ارنالدى، دەپ حابارلايدى قازاقپارات ءتىلشىسى.
بۇگىنگى جيىن ق ر پرەزيدەنتى قاسىم- جومارت توقايەۆتىڭ قىرعىز ەلىنە مەملەكەتتىك ساپارى قارساڭىندا ءوتىپ جاتىر.
اتاپ ايتقاندا، و. كارايەۆتىڭ «چاگاتايسكي ۋلۋس. گوسۋدارستۆو حايدۋ. موگۋليستان» اتتى ەڭبەگى، قازاق تىلىنە العاش رەت تولىق اۋدارىلىپ باسىلعان قىرعىز حالقىنىڭ تاريحي داستانى «ەر ەسىم» جانە ز. ك. كۋرمانوۆتىڭ «كىرگىزسكي فيليال پارتي «الاش» : سوزدانيە، دەياتەلنوست، سۋدبا» اتتى كىتاپتارى كوپشىلىك نازارىنا ۇسىنىلدى.
«بۇگىنگى جيىنعا ارنايى ازىرلەپ اكەلگەن ءۇش كىتابىمىز بار. بۇل كىتاپتار بۇگىنگى فورۋمنىڭ ءمانىسى مەن ماعىناسىنا ساي كەلىپ تۇر» ، - دەدى حالىقارالىق تۇركى اكادەمياسىنىڭ پرەزيدەنتى دارحان قىدىرالى.
ايتا كەتەيىك، القالى جيىنعا ق ر پرەزيدەنتىنىڭ كومەكشىسى ماۋلەن اشىمبايەۆ، قىرعىز رەسپۋبليكاسى پرەزيدەنتىنىڭ كەڭەسشىسى سۇلتان رايەۆ، قىرعىز رەسپۋبليكاسى ءبىلىم جانە عىلىمي ءمينيسترى كانىبەك يساكوۆ، قازاقستان رەسپۋبليكاسىنىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قايرات نۇرپەيىسوۆ، قىرعىز رەسپۋبليكاسىنىڭ جوگوركۋ كەنەش دەپۋتاتتارى، بەلگىلى مەملەكەت جانە قوعام قايراتكەرلەرى، ەكى ەلدىڭ تانىمال عالىمدارى، اكادەميكتەر، عىلىمي ينستيتۋت باسشىلارى، زيالى قاۋىم وكىلدەرى قاتىستى.
قازاق- قىرعىز زيالىلارىنىڭ العاشقى باسقوسۋى تۇركى اكادەمياسىنىڭ باستاماسىمەن 2018 -جىلدىڭ ءساۋىر ايىندا نۇر- سۇلتان قالاسىندا وتكەن بولاتىن. بۇدان كەيىن تۋىسقان ەكى ەلدىڭ ىنتىماقتاستىعىنا ايرىقشا ىقپال ەتكەن يگى شارا سول جىلعى قازان ايىندا وش قالاسىندا جالعاسىن تاپتى.
سونىمەن قاتار، ۇلى دالانىڭ ماڭگىلىك ميراسى «ماناس» داستانى مەن كورنەكتى عالىم شوقان ءۋاليحانوۆ تاعىلىمىنا ارنالعان ءۇشىنشى فورۋم بيىلعى ماۋسىم ايىندا جەتىسۋ جەرىندە، تالدىقورعان قالاسىندا ۇيىمداستىرىلدى.
