اسقار مامين: جالاقىنى ۋاقتىلى بەرۋدە زاڭ نورمالارىن قاتاڭداتۋدى تاپسىرامىن

نۇر-سۇلتان. قازاقپارات - ۇكىمەت باسشىسى جالاقىنى بەرمەۋدىڭ جۇمىس بەرۋشى ءۇشىن ءتيىمسىز بولاتىنداي ەتىپ زاڭناما نورمالارىن قاتاڭداتۋدى تاپسىردى، دەپ حابارلايدى قازاقپارات ءتىلشىسى.

«ەلباسى مەن مەملەكەت باسشىسىنىڭ بىزگە مىندەتتەگەن تاپسىرمالارىنىڭ ءبىرى - الەۋمەتتىك تۇراقتىلىقتى قامتاماسىز ەتىپ، جۇمىسشىلار ءۇشىن ءقاۋىپسىز ەڭبەك جاعدايىن جاساۋ. قازىرگى ۋاقىتتا بۇل سالادا ناقتى بازا بار. ءۇشجاقتى الەۋمەتتىك ارىپتەستىك قاراستىرىلعان. قاۋىپسىزدىك تەحنيكاسىن ساقتاپ، جاراقاتتاردى ازايتۋ باعىتىندا شارا قابىلدانىپ جاتىر. جالپى، مينيسترلىك پەن كاسىپوداقتار فەدەراتسيالارىنىڭ ەڭبەك قاتىناستارىن جەتىلدىرۋ جونىندەگى ۇسىنىستارىن قولدايمىز»، - دەدى اسقار مامين.

ۇكىمەت باسشىسى نازار اۋدارارلىق ماسەلەلەر بارىن اتاپ ءوتتى.

«ۇكىمەت وندىرىستىك جاراقاتتاردى ازايتۋ جونىندەگى جول كارتاسىن قابىلدادى. ول ىسكە اسىرىلۋدا. وسى باعىتتا جۇمىستى جەتىلدىرىپ، وندىرىستەگى جازاتايىم جاعدايلاردىڭ الدىن الۋعا نازار اۋدارعان ءجون. ءوڭىر اكىمدىكتەرى قاجەت بولعان جاعدايدا ەڭبەك جونىندەگى مەملەكەتتىك ينسپەكتسيالىق قۇرامنىڭ سانىن ارتتىرۋ كەرەك»، - دەدى ول.

اسقار ماميننىڭ ايتۋىنشا، ەڭبەك قاتىناسىندا جالاقى بويىنشا بەرەشەكتىڭ مونيترينگىلەۋ الگورتمىن قايتا قاراۋ قاجەت.

«سونىمەن قاتار، كاسىپوداقتار، «اتامەكەن» كاسىپكەرلەر پالاتاسى مۇددەلى مەملەكەتتىك ورگاندارمەن بىرگە جالاقىنى ۋاقتىلى بەرۋ جونىندە زاڭناما نورمالارىن قاتاڭداتۋدى تاپسىرامىن. جۇمىسشىعا جالاقىسىن بەرمەۋ - جۇمىس بەرۋشىگە ءتيىمسىز بولۋ كەرەك»، - دەدى ول.

اۆتور: ايان بەكەن ۇلى