ۇكىمەت باسشىسى مەمورگانداردىڭ ينتەرنەت رەسۋرستارىنىڭ ءبىرىڭعاي پلاتفورماسىن قۇرۋدى جۇكتەدى

نۇر-سۇلتان. قازاقپارات - اسقار ماميننىڭ ايتۋىنشا، مەملەكەتتىك ورگانداردىڭ ينتەرنەت رەسۋرستارىنىڭ ءبىرىڭعاي پلاتفورماسىن قۇرۋ - مەمورگان سايتتارىن بىرىكتىرۋگە جول اشادى، دەپ حابارلايدى قازاقپارات ءتىلشىسى.

«ەلەكتروندى ۇكىمەت» پورتالىندا مەملەكەتتىك قىزمەتتەردى تۇراقتى تۇردە كورسەتۋ - باسىم مىندەتتەردىڭ ءبىرى. الايدا بيىل مەملەكەتتىك ورگانداردىڭ جۇيەلەرىنىڭ ىستەن شىعۋىنا شامامەن 130 رەت جول بەرىلگەن. بۇعان ازاماتتار تاراپىنان ەلەۋلى سىن ايتىلدى. ونداي جاعدايلاردىڭ باسىم بولىگى ءىىم، ەڭبەك جانە حالىقتى الەۋمەتتىك قورعاۋ مينيسترلىگىندە، قۇقىقتىق ستاتيستيكا كوميتەتىندە كەزدەسەدى. ۆەدومستۆولىق جۇيەلەردىڭ تۇراقتى جۇمىس ىستەۋىن باقىلاپ، مونيتورينگتى كورسەتۋ ماقساتىندا جاۋاپتى باسشىلارعا وسى ماسەلەگە جەتەكشىلىك ەتەتىن ورىنباساردى دەربەس جاۋاپتى ەتۋدى تاپسىرامىن»، - دەدى اسقار مامين ۇكىمەت وتىرىسىندا.

ۇكىمەت باسشىسى سونىمەن بىرگە، مەملەكەتتىك ورگانداردىڭ ينتەرنەت رەسۋرستارىنىڭ ءبىرىڭعاي پلاتفورماسىن قۇرۋ - مەمورگان سايتتارىن بىرىكتىرۋ مۇمكىندىگىن بەرەتىنىن اتاپ ءوتتى.

«بۇل شارا دەر كەزىندە قولعا الىنىپ وتىر. سوندىقتان، بارلىق ورتالىق مەملەكەتتىك ورگانعا بيىلعى جىلدىڭ سوڭىنا دەيىن ءبىرىڭعاي پلاتفورماعا كوشۋدى تاپسىرامىن»، - دەدى اسقار مامين.

اۆتور: ايان بەكەن ۇلى