الماتى وبلىسىندا قاقاعان قىستا دا دالادا سۋعا شومىلۋعا بولادى

تالدىقورعان. قازاقپارات - الماتى وبلىسىندا جەر استىنان شىعاتىن ىستىق سۋعا كەلۋشىلەر سانى ارتۋدا.

ۇيعىر اۋدانىنا قاراستى قارادالا جازىعىندا تۋريزم سالاسى دامىپ جاتىر. مۇندا جەر استىنان شىعاتىن ىستىق سۋدىڭ تەمپەراتۋراسى 42-56 گرادۋسقا دەيىن جەتەدى، دەپ حابارلايدى قازاقپارات ءتىلشىسى.

تەرمالدى سۋدىڭ شيپالىق قاسيەتى دە جوق ەمەس. قۇرامىندا ءتۇرلى مينەرالدار مەن رادون ەلەمەنتتەرى بار. قارادالا جازىعىندا جىل سايىن 70 مىڭعا دەيىن تۋريست كەلىپ قايتادى. نەگىزىنەن الماتى قالاسى مەن وبلىس تۇرعىندارى.

«ءبىزدىڭ تۋعان جەرىمىزدە وسىنداي تاماشا جەردىڭ بارىنا وتە قۋانىشتىمىن. الماتىدان 300 شاقىرىمداي عانا جەردە ورنالاسقان ىستىق سۋدىڭ شيپالى سۋىنا ءتانتىمىن. دەنساۋلىققا وتە پايدالى. وسى سۋعا تۇسسەم شارشاعانىم بىردەن باسىلادى. كوپ ادامدار بۇل جەردىڭ قاسيەتىن بىلمەي جاتادى. سوندىقتان حالىققا كوبىرەك ناسيحاتتاۋ كەرەك. مىنە قاراڭىزشى، قاراشانىڭ قارا سۋىعىندا ءبىز دالادا ىستىق سۋعا ءتۇسىپ، كەرەمەت دەمالىپ جاتىرمىز. بۇل ىستىق سۋ اسىرەسە بۋىن اۋرۋلارىنا وتە تاماشا. سونى كوبى بىلە بەرمەيدى»، - دەيدى الماتى قالاسىنىڭ تۇرعىنى باقىت مەرەكەن قىزى.

قارادالا ەلدى- مەكەنىندە حالىققا قىزمەت كورسەتەتىن دەمالىس ورىندارى وتە كوپ. قىزمەت باعاسى ساپاسىنا قاراي وسە بەرەدى. ال باسسەيندەر دالادا دا، عيمارات ىشىندە دە ورنالاسقان. ونداعى ىستىق سۋدىڭ تەمپەراتۋراسى 32- 49 گرادۋسقا دەيىن بارادى. جەرگىلىكتى تۇرعىندار، كەي دەمالىس ورىندارىندا ىستىق سۋ 56 گرادۋسقا دەيىنگى تەمپەراتۋرادا شىعاتىنىن ايتادى. سوندىقتان تۋريستەر وسى جايتقا ءمان بەرىپ، دەمالىس ورىندارىنا بارعاندا، سۋدىڭ تەمپەراتۋراسىن سۇراپ الۋلارىنا بولادى.

«ىستىق سۋداعى دەمالىس ورىندارىنىڭ باعاسى ءارقالاي. ەڭ ارزانى ادام باسىنا 8 مىڭ تەڭگەدەن باستالادى. ونىڭ ىشىنە تاڭعى اس، سۋعا ءتۇسۋ، جاتىن ورىن كىرەدى. ەگەر قالاساڭىز ادام باسىنا 25 مىڭ تەڭگەلىك جەرلەر دە بار. كۇن سۋىتقان سايىن ۇيعىر اۋدانىنداعى ىستىق سۋدىڭ ماۋسىمى قىزا تۇسەدى. اسىرەسە، الماتىلىقتار قىسقى ماۋسىمدا وسى جاققا قاراي اعىلادى. حالىقتىڭ لەگى جىلدان-جىلعا ارتۋدا»، - «Qazaq Travel» كومپانياسىنىڭ باسشىسى جاندوس نۇريەۆ.

قارادالا جازىعىنىڭ باس جوسپارى جىل سوڭىنا دەيىن دايىن بولماق. تۋريستىك ايماقتا ءالى دە شەشىمىن تاپپاعان ماسەلەلەر جەتكىلىكتى. اۋىز سۋ جانە كارىز جۇيەسىن رەتكە كەلتىرۋ قاجەت. قاتتى تۇرمىستىق قالدىقتار توگەتىن ورىن جوق. ىستىق سۋدىڭ مەديتسينالىق، ەمدىك ادىستەمەلەرىن جەتىلدىرۋدى قاجەت ەتەدى. وسى جانە باسقا دا ماسەلەلەر تۋريستىك ماۋسىمنىڭ اشىلۋى بارىسىندا كوتەرىلدى.

«ينۆەستور تابىلدى. جاڭا جىلدان كەيىن ينۆەستورلار كەلىپ، قانداي باعىتتا جۇمىستار ىستەيتىندىگى تالقىلانادى»، - دەدى ۇيعىر اۋدانى اكىمىنىڭ ورىنباسارى ءالىمجان حۋسۋروۆ.

جاڭا دەمالىس ورىندارى اشىلىپ، ىستىق سۋدىڭ مۇمكىندىكتەرىن تولىق پايدالانسا تۋريستەر سانىن ءبىر جىلدا 1 ميلليون ادامعا جەتكىزۋگە ابدەن بولادى، دەيدى سالا ماماندارى.

بۇل جولى ۇيعىر اۋدانىنداعى ىستىق سۋدا ب ا ق وكىلدەرى مەن اۋدان اكىمدەرىنىڭ باسپا ءسوز حاتشىلارى اراسىندا ارنايى سەمينار ۇيىمداستىرىلىپ، قوناقتار تەك بىلىمدەرىن عانا شىڭداپ قويماي، ىستىق سۋدا دەمالىپ، تەرمالدى سۋدىڭ قاسيەتىن سەزىنىپ، تانىسىپ قايتتى.

«جەتىسۋ- جاقۇت مەكەنىم» اتتى بلوگ- تۋردىڭ ماقساتى وسى جەرگە جۋرناليستەردى، بلوگەرلاردى وزگە دە سالا ماماندارىن اكەلىپ، ءبىزدىڭ تۋريزم سالاسىنىڭ الەۋەتىن كورسەتۋ. ناسيحاتتاۋ. بۇگىندە بۇل جەردىڭ بولاشاعى وتە زور دەپ سانايمىز. سوندىقتان جەتىسۋدىڭ تاعى ءبىر كەرەمەت جاقۇتى سانالاتىن ىستىق سۋدى برەندكە اينالدىرساق، بۇكىل الەم تانىسا دەگەن ماقساتىمىز بار. ءبىز ۇيىمداستىرعان شارا بارىسىندا جالپى الەۋمەتتىك جەلىدەگى ارنايى پاراقشالاردى قالاي جۇرگىزۋ كەرەك، كاسىبي سالادا جەتىستىككە جەتۋ جونىندە سەرىك مامبەتوۆ، الماس توقابايەۆ سىندى ماماندار ارنايى ءدارىس وتكىزدى»، - دەدى «جەتىسۋ مەديا» ورتالىعىنىڭ ديرەكتورى جاننا ارىنبەكوۆا.

بلوگەر، سەناريست الماس توقابايەۆ الماتى وبلىسى اكىمدىگىنىڭ اۋداندارىندا جۇمىس ىستەيتىن باسپا ءسوز حاتشىلارىنا اقپاراتتى قىسقا جازۋعا كەڭەس بەردى. سەبەبى، ونىڭ پايىمىنشا، الەۋمەتتىك جەلىدە وتىراتىن ادامدار قازىر قىسقا اقپاراتتى عانا قابىلداۋعا داعدىلانعان.

اۆتور: سامال قابىشەۆا