قازاقستان سياقتى كورشىمىزدىڭ بولعانىنا قۋانۋىمىز كەرەك - قىرعىزستان عالىمى

بىشكەك. قازاقپارات - قازاقستان مەن قىرعىزستان بيزنەسى بىرلەسكەن كاسىپورىنداردى قۇرۋعا نازار اۋدارۋى كەرەك.

بۇل تۋرالى ق ر پرەزيدەنتى قاسىم- جومارت توقايەۆتىڭ قىرعىزستانعا مەملەكەتتىك ساپارى قارساڭىندا قىرعىز- رەسەي ۋنيۆەرسيتەتىنىڭ ۇلتتىق ەكونوميكا جانە وڭىرلىك دامۋ كافەدراسىنىڭ مەڭگەرۋشىسى، پروفەسسور اسىلبەك ايۋپوۆ ءمالىم ەتتى، دەپ حابارلايدى قازاقپارات ءتىلشىسى.

«قازاقستان مەن قىرعىزستان باۋىرلاس ءارى كورشىلەس ەلدەر. بۇرىننان ءبىزدىڭ مەملەكەتتەر اراسىندا تىعىز قارىم- قاتىناس قالىپتاسقان. ءبىزدىڭ وتباسىمىزعا توقتالساق، مەنىڭ انام قازاق. اشارشىلىق جىلدارىندا ناعاشى اتام وسىندا قونىستانعان. سونىمەن قاتار، مەنىڭ قىزىم قازاق جىگىتىنە تۇرمىسقا شىقتى، ياعني بىزدە تۋىستىق جانە باۋىرلاستىق بايلانىستار وتە جاقىن ەكەنىن بايقاۋعا بولادى. سوندىقتان كەيبىرەۋلەر قالاماسا دا، وبەكتيۆتى تۇرعىدا ءبىزدىڭ ەلدەر تىعىز ىنتىماقتاستىقتا بولۋى ءتيىس. اتاپ ايتقاندا، ەكونوميكالىق جانە مادەني قارىم- قاتىناستارىمىزعا ەرەكشە ەكپىن قويعان ءجون. تەرريتوريالىق ءارى ەكونوميكالىق الەۋەتتەرىمىز ءارتۇرلى، سونداي- اق قازاقستاننىڭ دامۋ قارقىنى ايتارلىقتاي جوعارى»، - دەدى عالىم.

وسى ورايدا ول نۇر- سۇلتان قالاسىندا 2017 -جىلى ەكسپو حالىقارالىق كورمەسىنىڭ، وزگە دە الەمدىك دەڭگەيدەگى شارالاردىڭ وتكىزىلۋى قازاقستاننىڭ دۇنيەجۇزىلىك ارەناداعى بەدەلىن ايعاقتاپ وتىرعانىن اتاپ ءوتتى.

«ەكى ەلدىڭ شەكارالاساتىن وڭىرلەرى اۋقىمدى تەرريتوريانى الىپ جاتىر. سوندىقتان قازاقستان سەكىلدى كورشىمىز بار ەكەنىنە قۋانىپ، ماقتان تۇتۋىمىز كەرەك. تاۋار اينالىم باعىتىنا توقتالساق، بۇل سالاعا ءبىراز جىلداردان بەرى نازار اۋدارىلىپ كەلەدى. ينۆەستيتسيالىق باعىتتا قازاقستان جاعى تەندەرلەرگە قاتىسىپ كەلەدى، ياعني ەلىمىزدە التىن ءوندىرۋ، تاۋ- كەن ونەركاسىبىن قامتىپ جاتىر. بۇدان بولەك، قازاق ينۆەستيتسيالارى قۇرىلىس ماتەريالدارى ونەركاسىبىنە بەلسەندى تارتىلۋدا. دەگەنمەن دە، بىرلەسكەن كاسىپورىنداردى قۇرۋ الەۋەتى ءالى دە جوعارى. اۋىل شارۋاشىلىعى ءبىزدىڭ ەكونوميكانىڭ ەلەۋلى ۇلەسىن الىپ جاتىر. ءبىز قايتا وڭدەۋ ونەركاسىبىن دامىتۋ قاجەتتىگىن ۇنەمى ايتىپ كەلەمىز. مەنىڭ ويىمشا، قازاقستاننان وسىمدىك مايىن جانە باسقا دا دايىن ونىمدەردى الىپ كەلەمىز، بۇل سالالاردا قازاقستاندىق بيزنەستە ەلەۋلى تاجىريبە بار. بۇل تۇرعىدا قىرعىز تاراپىنا سەرىكتەستەردى الىستان ىزدەمەي، كورشىمىزبەن بىرگە اۋىل شارۋاشىلىعى ونىمدەرىن وڭدەۋ بويىنشا بىرلەسكەن كاسىپورىنداردى قۇرعان ءتيىمدى بولار ەدى. وسى جوبالار ەكى ەلگە دە ەلەۋلى پايدا تۇسىرەدى دەپ سانايمىن»، - دەدى اسىلبەك ايۋپوۆ.

بۇل رەتتە عالىم قازاقستان پرەزيدەنتىنىڭ ساپارى كەزىندە اتالعان تاقىرىپتاردى قىرعىزستان ۇكىمەتى بەلسەندى كوتەرۋى كەرەكتىگىن جەتكىزدى.

«مەملەكەت باسشىلارى ەكى ەل قارىم- قاتىناسىندا وڭتايلى تۇزەتۋلەرگە ەرەكشە ءمان بەرەدى دەپ ويلايمىن. وسى ورايدا ءوزارا مۇددەلەستىك بار، ەلدەرىمىز اراسىندا ءبىر- بىرىنە دەگەن جاناشىرلىق بار. سوندىقتان الداعى جوعارى دەڭگەيدەگى كەزدەسۋدە تالقىلايتىن تاقىرىپتار دا، ۇسىنىستار دا بار»، - دەدى پروفەسسور.

بۇدان بۇرىن حابارلانعانداي، 27 - قاراشادا قازاقستان پرەزيدەنتى قاسىم- جومارت توقايەۆ قىرعىزستان پرەزيدەنتى سوورونباي جەەنبەكوۆتىڭ شاقىرۋىمەن قىرعىزستانعا مەملەكەتتىك ساپارمەن بارادى.

كەلىسسوزدەر بارىسىندا ەكى ەل باسشىلارى قازاقستان مەن قىرعىزستان اراسىنداعى ستراتەگيالىق سەرىكتەستىكتىڭ قازىرگى احۋالى مەن پەرسپەكتيۆالارىن تالقىلايدى جانە كەزدەسۋ قورىتىندىسى بويىنشا ءبىرقاتار ەكىجاقتى قۇجاتتارعا قول قويادى دەپ جوسپارلانۋدا.

اۆتور: رۋسلان عابباسوۆ