مينيستر مۇعالىمدەردى دايارلايتىن ج و و- لاردى جاپپاي قىسقارتپاق

نۇر- سۇلتان. قازاقپارات - ءبىلىم جانە عىلىم ءمينيسترى اسحات ايماعامبەتوۆ ەلىمىزدىڭ جوعارى وقۋ ورىندارىن تەكسەرۋ جۇمىسىنىڭ قورىتىندىسىن جاريالادى، دەپ حابارلايدى قازاقپارات ءتىلشىسى.

«بۇگىنگى تاڭدا باعالاۋ جۇيەسىنىڭ تىزبەسىنە ەنگەن 13 ۋنيۆەرسيتەت تەكسەرىلدى. ولاردىڭ 5-دە بۇعان دەيىنگى ەسكەرتۋلەر جويىلماعاندىقتان، 5 ۋنيۆەرسيتەتتىڭ ليسەنزياسى ءبىر ايعا توقتاتىلدى. سونداي- اق، 12 جوعارى وقۋ ورنىنا ايىپپۇل سالىنىپ، 1 ۋنيۆەرسيتەت بويىنشا ءىس سوتقا جىبەرىلدى. جىل سوڭىنا دەيىن تاعى 12 ج و و- نى بۇرىن بەرىلگەن نۇسقامالاردىڭ ورىندالۋى بويىنشا تەكسەرۋدى جوسپارلاپ وتىرمىز. بۇزۋشىلىقتار قايتا انىقتالعان جاعدايدا، ليسەنزيادان ايىرۋ جانە ج و و جابۋ ءۇشىن قۇجاتتار سوتقا جىبەرىلەدى»، - دەپ جازدى مينيستر Facebook-تەگى پاراقشاسىندا.

ءمينيستردىڭ مالىمەتىنشە، قازىرگى ۋاقىتتا مىندەتتەرىنە جاۋاپسىز قارايتىن جوعارى وقۋ ورىندارىنىڭ ليتسەنزيالارىن كەرى قايتارىپ الۋعا قۇقىق بەرەتىن زاڭ نورمالارىن ەنگىزۋ جوسپارلانىپ وتىر.

«بۇل باستاما مەملەكەت باسشىسى تاراپىنان قولداۋعا يە بولدى. قازىر ليتسەنزيانى قايتارىپ الۋ ءۇشىن سوتقا جۇگىنۋ نەمەسە قاجەت بولعان جاعدايدا بارلىق شاعىمدانۋ پروتسەدۋراسىنان ءوتۋ كەرەكتىگىن ەستەرىڭىزگە سالامىن. وعان قوسا، پرەمەر- ءمينيستردىڭ وكىمىنە سايكەس ۇكىمەت جانىنان جوعارى وقۋ ورىندارىن وڭتايلاندىرۋ كوميسسياسى قۇرىلدى. بۇدان بولەك، جوعارى وقۋ ورىندارىنا قويىلاتىن بىلىكتىلىك تالاپتارىن دا كۇشەيتۋدەمىز. اسىرەسە ليتسەنزيالارىندا پەداگوگتەردى دايارلاۋعا ارنالعان قوسىمشالارى بار جوعارى وقۋ ورىندارىنا قوسىمشا تالاپتار دايىنداۋدا. ولاردىڭ سانى - 85»، - دەيدى ول.

اسحات ايماعامبەتوۆ بۇگىن دە كوپ بەيىندى ۋنيۆەرسيتەتتىڭ بارلىعى مۇعالىمدەردى دايارلايتىنىن، الايدا ولاردىڭ ساپاسى سىن كوتەرمەيتىندىكتەن، قويىلاتىن تالاپتاردى كۇشەيتۋ ارقىلى مۇعالىمدەردى دايارلايتىن ج و و سانىن 85-تەن 20-25-كە دەيىن قىسقارتۋ جوسپارلانىپ وتىرعانىن اتاپ ءوتتى.

«ولار باسقا باعىتتار بويىنشا ماماندار دايارلاي بەرەدى. ال پەداگوگيكا بويىنشا ليتسەنزيالارى قايتارىلىپ الىنۋى مۇمكىن. شامامەن العاندا، ءار ايماقتا مۇعالىمدەردى دايارلايتىن 1 مىقتى ج و و جانە الماتىدا بىرنەشە وقۋ ورنى بولماق. ناشار ساباق ۇلگەرىمى ءۇشىن وقۋدان شىعارىلعانداردىڭ ءبارىن قابىلداي بەرۋ ەسەبىنەن كەيبىر جوعارى وقۋ ورنىنا 100 ادام ءتۇسىپ، 800-گە جۋىق تۇلەك بىتىرەتىنىن اتاپ وتكىم كەلەدى. تاعى ءبىر جايت، بيىل 37 مىڭ ستۋدەنت تاياۋ شەتەلدىڭ ج و و- دا ءبىر سەمەستر نەمەسە ءبىر جىل وقىعان سوڭ قازاقستاندىق شاعىن ج و و- نا اۋىسىپ كەلدى. اقپاراتقا سۇيەنسەك، ۇ ب ت سەرتيفيكاتىنىڭ تالاپ ەتىلۋىن اينالىپ ءوتۋ ءۇشىن تالاپكەرلەر قۇجاتتارىن شەتەلدىك ج و و جىبەرىپ، ءبىر سەمەستر نەمەسە ءبىر جىلدان كەيىن ۆيرتۋالدى تۇردە قازاقستاندىق ۋنيۆەرسيتەتتكە اۋىسىپ الاتىن تەندەنتسيا دا بار. 20-23 مىڭعا دەيىن ستۋدەنت وقيتىن جانە ولاردىڭ كوپشىلىگى، ادەتتە، ساباققا دا بارمايتىن كەيبىر وڭىرلىك جەكە مەنشىك ج و و دا بار»، - دەدى مينيستر.

سوندىقتان دا مينيسترلىك وسىنداي جاعدايلار مەن جاۋاپكەرشىلىگى تومەن ج و و قاتىستى قاتاڭ ساياسات جۇرگىزبەك.

«البەتتە، بۇل شارالار بارلىعىنا بىردەي ۇناي بەرمەيتىنى انىق. دەگەنمەن، ەلباسى مەن مەملەكەت باسشىسىنىڭ تاپسىرمالارىنا سايكەس، مينيسترلىك جوعارى ءبىلىم بەرۋ سالاسىندا ساپانى قامتاماسىز ەتۋ ساياساتىن ودان ءارى جالعاستىرادى»، - دەپ ءتۇيدى مينيستر.

اۆتور ايان بەكەن ۇلى