سولتۇستىك قازاقستاننىڭ زاڭگەرلەرى حالىقتى تەگىن قابىلداپ، كەڭەس بەردى
س ق و سىبايلاس جەمقورلىققا قارسى قىزمەت ماماندارىنىڭ مالىمەتىنشە، «حالىق زاڭگەرى» جالپىرەسپۋبليكالىق ناۋقانى ەلىمىزدە ءداستۇرلى تۇردە ۇيىمداستىرىلىپ كەلەدى.
«بۇل، ەلىمىزدىڭ بارلىق ءىرى قالالارىندا وتەتىن جىل سايىنعى ءىس- شارا. ناۋقاندى سىبايلاس جەمقورلىققا قارسى ءىس- قيمىل اگەنتتىگى، zakon.kz جەلىلىك باسىلىمى، «پاراگراف» اقپاراتتىق جۇيەسى، سونداي-اق قازاقستاننىڭ ۇزدىك زاڭگەرلەرى جانە ادۆوكاتتارى ۇيىمداستىرىپ وتىر. ولاردىڭ اراسىندا بەلگىلى ادۆوكاتتار، نوتاريۋستار، سوت ورىنداۋشىلارى، پوليتسەيلەر، ادىلەت، كوشى-قون پوليتسياسىنىڭ قىزمەتكەرلەرى جانە مەملەكەتتىك ورگانداردىڭ باسشىلارى بار» - دەدى وبلىستىق سىبايلاس جەمقورلىققا قارسى قىزمەتتىڭ باسشىسى ەرنار بايانعازين.
پەتروپاۆلدا شارا «Dostyk Mall» ساۋدا، ويىن-ساۋىق ورتالىعىندا ءوتتى. وندا ءتۇرلى سالادان ۇسىنىلعان 30-دان استام كاسىبي زاڭگەر وبلىس ورتالىعىنىڭ تۇرعىندارىنا تەگىن زاڭگەرلىك كومەك كورسەتتى. حالىقتىڭ قۇقىقتىق ساۋاتتىلىعىن ارتتىرۋعا سەپتىگىن تيگىزدى.
تۇرعىنداردىڭ دەنى جەر قاتىناستارى، مۇگەدەكتىك بەرۋ، سالىق اۋدارىمدارى، الەۋمەتتىك قورعاۋ، سوت اكتىلەرىن ورىنداۋ، زەينەتاقى اۋدارىمدارى، نەكە بۇزۋ پروتسەستەرى مەن مۇلىكتى بولۋگە قاتىستى ماسەلەلەر بويىنشا مامانداردىڭ كومەگىنە جۇگىندى.
«تانىمال ادۆوكاتتار مەن كاسىبي بىلىكتى مامانداردان تەگىن كەڭەس الۋعا مۇمكىندىك بەرگەندەرى ءۇشىن ريزامىز. ءبىز سياقتى قاراپايىم ازاماتتارعا پايداسى مول ءىس-شارا. اسىرەسە، زاڭگەر سەرگەي سيزينتسيەۆقا العىس بىلدىرەمىن. مەنىڭ ماسەلەمدى باستان- اياق تىڭداپ، ونى شەشۋدىڭ جولىن ءتۇسىندىرىپ بەردى»، - دەدى اكسياعا كەلگەن قالا تۇرعىنى.
«حالىق زاڭگەرىنىڭ» بيىلعى ەرەكشەلىگى - ونىڭ وبلىس اۋداندارىندا ءبىر ۋاقىتتا وتكىزىلۋىندە. وسىلايشا ۇيىمداستىرۋشىلار شالعاي ورنالاسقان ەلدى مەكەندەردىڭ ازاماتتارىن دا ۇمىت قالدىرمادى. س ق و بويىنشا 600 دەن استام ادام مامانداردىڭ كەڭەسىن الدى.
اۆتور: اقەركە داۋرەنبەك قىزى
