مىندەتىن ورىنداي المايتىن ج و و- لار مەن كوللەدجدەر قىسقارتىلۋى مۇمكىن - ساپاربايەۆ
بۇعان دەيىن حابارلاعانىمىزداي، وڭىرگە ساپارمەن كەلگەن ۇكىمەت مۇشەلەرى جاستارمەن كەزدەسكەن بولاتىن. وبلىستىق فيلارمونيا عيماراتىندا جالعاسقان بۇگىنگى كەزدەسۋدىڭ باستى تاقىرىبى مەملەكەت باسشىسى ق. توقايەۆتىڭ قازاقستان حالقىنا ارناعان جولداۋىنداعى نەگىزگى باسىمدىقتاردى ءتۇسىندىرۋ.
ب. ساپاربايەۆ ءبىلىم، دەنساۋلىق، ا ا ك، بيزنەس، الەۋمەتتىك مەديتسينالىق ساقتاندىرۋ سالالارىنا بولىنگەن قارجىلار جانە الداعى ۋاقىتتا اتقارىلاتىن جۇمىستار تۋرالى كەڭىنەن تارقاتىپ ءوتتى.
«ەگەمەندىك العالى ەلدىڭ ۇستانىپ كەلە جاتقان ساياساتى - حالىقتىڭ ءال- اۋقاتىن جاقسارتۋ. سوعان بايلانىستى تۇكپىر- تۇكپىرىندە كاسىپورىندار اشىلىپ، جاڭا جۇمىس ورىندارى پايدا بولىپ، بالاباقشا مەن مەكتەپتەردىڭ سانى كوبەيۋدە. وزدەرىڭىز ەستىپ جاتقان بولارسىزدار، «حالىق دەنساۋلىعى تۋرالى» كودەكستىڭ جوباسى پارلامەنتتىڭ قاراۋىنا جىبەرىلدى. سوعان سايكەس، الداعى جىلدان باستاپ مەديتسينالىق ساقتاندىرۋ جۇيەسى جۇمىس ىستەي باستايدى. قازىرگى قولدانىستاعى جۇيە بويىنشا تەگىن كورسەتىلەتىن قىزمەتتەر سول قالپى ساقتالىپ قالادى. ساقتاندىرۋ جۇيەسى قوسىمشا قىزمەتتەردى قامتيدى. جاڭا جۇيە بويىنشا حالىقتى ءدارى- دارمەكپەن قامتۋ، مەديتسينالىق وڭالتۋ قىزمەتتەرى جەتىلە تۇسەدى. سونداي- اق، 2025 -جىلعا دەيىن بارلىق ەلدى مەكەندەردە ەڭ كەمىندە مەديتسينالىق بەكەت نەمەسە ەمحانا بولۋى ءتيىس. مۇنان بولەك، اپاتتى جاعدايداعى بارلىق مەديتسينالىق مەكەمەلەر جوندەلەدى ءارى ولاردىڭ ماتەريالدىق- تەحنيكالىق بازاسى حالىقارالىق تالاپتارعا سايكەستەندىرىلەدى. باسپانا الۋ ءۇشىن 10-15 جىل كەزەكتە تۇرۋدىڭ قاجەتى جوق. «نۇرلى جەر»، «7-20-25» مەملەكەتتىك باعدارلامالار ارقىلى پاتەر كىلتىن يەلەنۋگە بولادى. ءبىر سوزبەن ايتقاندا، ەڭبەكتەنىپ، لايىقتى ءومىر سۇرەمىن دەگەندەر ءۇشىن بارلىق جاعداي جاسالىپ جاتىر»، - دەدى ول.
ق ر پرەمەر- ءمينيسترىنىڭ ورىنباسارى اتاپ وتكەندەي، ۇكىمەتتىڭ نەگىزگى مىندەتتەرىنىڭ ءبىرى - ەكونوميكا قارقىنىن تومەندەتپەۋ. وتكەن جىلمەن سالىستىرعاندا بيىلعى ءوسىم 4,5 پايىزعا تەڭ. وتكەن 10 ايدىڭ ىشىندە 369 مىڭ قازاقستاندىق جۇمىسپەن قامتىلعان. بەردىبەك ساپاربايەۆ ءبىلىم سالاسىنا قاتىستى وزگەرىستەر تۋرالى ءسوز ەتتى.
«2020 -جىلى ۇستازداردىڭ جالاقىسى 30 پايىزعا كوتەرىلەدى. سونىمەن قاتار، قازىر 3 اۋىسىمدى مەكتەپتەر مەن اپاتتىق جاعدايدا دەپ تانىلعان وقۋ وشاقتارىنىڭ پروبلەمالارىن شەشۋگە كوڭىل ءبولىنىپ جاتىر. سوڭعى ۋاقىتتا جوعارى ءبىلىم ساپاسى اقساپ بارادى. ەل بويىنشا 132 ۋنيۆەرسيتەت بار. ءبىراق، بارلىعى بىردەي بىلىكتى كادرلاردى دايارلاي الماي جاتىر. ۇكىمەت كوميسسياسى وسى باعىتتا قىرۋار شارۋا اتقارۋدا. جۇكتەلگەن مىندەتتى ورىنداي المايتىن ۋنيۆەرسيتەتتەر مەن كوللەدجدەر قىسقارتىلۋى مۇمكىن»، - دەيدى ق ر پرەمەر- ءمينيسترىنىڭ ورىنباسارى.
سوڭعى جىلدارى دەنە شىنىقتىرۋ مەن بوس ۋاقىتتى وتكىزۋگە ارنالعان نىساندار اشىلىپ جاتىر. اسىرەسە، باسىمدىق ەلدى مەكەندەرگە بەرىلۋدە. بۇل رەتتە «اۋىل - ەل بەسىگى» باعدارلاماسى جاسالعان. ەسكە سالساق، اتالمىش باعدارلاما ارقىلى قازاقستاندىقتاردىڭ جەرگىلىكتى جەردەگى ەڭبەگىنە قاتىستى يدەولوگياسى قولعا الىنباق.
كەزدەسۋ سوڭىندا جيىلعاندار ۆيتسە- پرەمەرگە كوكەيلەرىندە جۇرگەن سۇراقتارىن دا جەتكىزدى.
اۆتور: قاسقىرباي قويشىمانوۆ
