جاھاندىق پروبلەمانى ەشبىر مەملەكەت جالعىز ءوزى شەشە المايدى - ساراپشى

نۇر-سۇلتان. قازاقپارات - بيىل بەسىنشى رەت وتەتىن «استانا كلۋبىنىڭ» وتىرىسىنا يادرولىق قارۋدى تاراتپاۋ ماسەلەسى، ا ق ش پەن قىتاي اراسىنداعى ساۋدا-ساتتىق سوعىسى، الەمدىك ەكونوميكانىڭ دامۋ ءۇردىسىنىڭ تومەندەۋى، جاھاندىق كليماتتىڭ وزگەرۋى سياقتى اۋقىمى كەڭ تاقىرىپتار قامتىلادى.

بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ەكونوميكا جانە ساياسات ينستيتۋتىنىڭ ساراپشىسى ەرلان ماديەۆ ايتتى، دەپ حابارلايدى قازاقپارات ءتىلشىسى.

«بيىل «استانا كلۋبىنىڭ» وتىرىسىندا يادرولىق قارۋدى تاراتپاۋ ماسەلەسى، ا ق ش پەن قىتاي اراسىنداعى ساۋدا-ساتتىق سوعىسى، الەمدىك ەكونوميكانىڭ دامۋ ءۇردىسىنىڭ ءتۇسۋى، جاھاندىق كليماتتىڭ وزگەرۋى سياقتى اۋقىمى كەڭ تاقىرىپتار قامتىلادى. وسى ماسەلەلەر بويىنشا پروگرەسكە جەتۋ - قيىن. ماڭىزدىسى - وسى ماسەلەلەر بويىنشا الەمدىك ارىپتەستىكتى ساقتاۋ جانە وعان جاڭا سەرپىن بەرۋ. قازىرگى ۋاقىتتا جاھاندىق پروبلەمانى ەشبىر مەملەكەت جالعىز ءوزى شەشە المايدى، ونى بۇكىل الەمدىك قاۋىمداستىق بىرىگىپ شەشۋى كەرەك. وسىنى جۇزەگە اسىرۋ ءۇشىن بىزگە ەڭ الدىمەن سۇحبات كەرەك. بۇل وتىرىستىڭ تۇپكى ماقساتىن، ماڭىزىن ءتۇسىنۋ - وتە ماڭىزدى»، - دەپ اتاپ ءوتتى ەكونوميكا جانە ساياسات ينستيتۋتىنىڭ ساراپشىسى ەرلان ماديەۆ.

ق ر تۇڭعىش پرەزيدەنتى - ەلباسى قورىنىڭ حالىقارالىق باعدارلامالارى ورتالىعىنىڭ باسشىسى قايرات ابۋسەيتوۆ «استانا كلۋبى» وتىرىسىندا كوتەرىلگەن ماسەلەلەردىڭ شەشۋ جولدارى قانشالىقتى جۇزەگە اساتىنى تۋرالى ايتتى.

«بۇل شارادا پىكىر-تالاس، تالقىلاۋ - وتە ماڭىزدى. وتىرىستا «استانا كلۋبى» قانداي دا ءبىر ۇسىنىمدار ايتپايدى»، - دەيدى ول.

بەسجىلدىق قىزمەت بارىسىندا استانا كلۋبى دۇنيەجۇزىنىڭ 40 ەلىنىڭ 200 دەن استام ساراپشىلارىنىڭ باس قوسقان بەدەلدى حالىقارالىق پىكىرتالاس الاڭىنا اينالدى.

اتالعان شارانى ق ر تۇڭعىش پرەزيدەنتى - ەلباسى قورى مەن قور جانىنداعى الەمدىك ەكونوميكا جانە ساياسات ينستيتۋتى ۇيىمداستىرادى. «استانا كلۋبىنىڭ» ميسسياسى - قازاقستاننىڭ سىرتقى ساياساتتاعى باسىمدىقتارى تۇرعىسىنان جاھاندىق كۇن ءتارتىبىن قالىپتاستىرۋ ءۇشىن ەۋرازيانىڭ جەتەكشى ساراپشىلارى، ساياسي كوشباسشىلارى مەن ديپلوماتتارىنىڭ باسىن بىرىكتىرۋ.