تۋىپ- وسكەن جەرىمدى قاتتى ساعىنىپ ءجۇرمىن - ەرجان ماكسيم
بويىنداعى تالانتىمەن تىڭدارماندى ءتانتى ەتكەن 12 جاسار ەرجان بيىلعى پولشانىڭ گليۆيتسە قالاسىندا وتەتىن «Junior Eurovision Song Contest 2019» ءان بايقاۋىندا قازاقستاننىڭ نامىسىن قورعايدى. بۇگىندە ول «بالالار ەۋرو ۆيدەنيەسى» بايقاۋىنا قىزۋ دايىندىق ۇستىندە. دەسە دە، ول بىزگە سۇحبات بەرۋگە ۋاقىتىن ءبولدى.
- ەرجان، سالەم! سۇحباتتاسۋعا كەلىسىمىڭدى بەرىپ، ۋاقىت تاپقانىڭا كوپ راحمەت. كەزەكپەن باستايىقشى. قازىر ەرجان ماكسيم وتباسىمەن رەسەيدە تۇرادى، يگور كرۋتويدىڭ اكادەمياسىندا ءبىلىم الىپ جاتىر. سولاي ما؟!
- سالەمەتسىز بە. سىزدەرگە دە راحمەت. ءيا، مەن، اكەم جانە انام ۇشەۋمىز بۇگىندە رەسەيدە، ماسكەۋ قالاسىندا تۇرىپ جاتىرمىز. يگور كرۋتويدىڭ اكادەمياسىندا وقيمىن.
- اكادەمياداعى ءبىر كۇنىڭنىڭ كەستەسىمەن بولىسە وتىرساڭ....
- يگور كرۋتويدىڭ مۋزىكالىق اكادەمياسىنا اپتاسىنا 2 رەت بارامىن. ساباعىم سارسەنبى، بەيسەنبى كۇندەرى كەشكى 18.00-دە باستالادى. ءبىرىنشى ساباق - ۆوكال. ودان كەيىن ەكى ساباق حورەوگرافيا بولادى. بەيسەنبى كۇنى ءبىر ساباق - ۆوكال، ەكى ساباق - اكتەرلىك شەبەرلىك.
- ساباعىڭ، رەسەي ەلى ۇناپ جاتىر ما وزىڭە؟
- ساباعىم، ارينە، ۇناپ جاتىر. ماسكەۋ دە ۇنايدى. ءبارى جاقسى، ءبارى تاماشا. ءبىراق ءوز ەلىمدى ساعىنامىن، اسىرەسە تۋىپ- وسكەن جەرىم - ورالدى قاتتى ساعىنىپ ءجۇرمىن. بۇگىندە اتاۋلى ۇلكەن شارالارعا قاتىسۋ ءۇشىن اراسىندا قازاقستانعا كەلىپ- كەتىپ ءجۇرمىن.
- سەن قازىرگى تاڭدا دۇنيە جۇزىنە تانىمال رەسەيلىك «گولوس. دەتي» تەلەۆيزيالىق جوباسىنىڭ جەڭىمپازىسىڭ. بۇل جوبانىڭ سەنىڭ ومىرىڭدەگى ورنى قانداي؟
- «گولوس. دەتي» جوباسى ماعان ەڭ الدىمەن تانىمالدىلىق اكەلدى. مەنى تەك قازاقستان ەمەس، وزگە ەلدەر دە تاني باستادى. رەسەيلىك، قازاقستاندىق شوۋ- بيزنەستەگى ونەر جۇلدىزدارىمەن تانىس بولدىم. «گولوس. دەتي» جوباسى قاتىسۋشىلارىنىڭ ۆاتساپتا چاتى بار. سول ارقىلى بارىمەن حابارلاسىپ تۇرامىن.
- «Junior Eurovision Song Contest 2019» حالىقارالىق بايقاۋىنا ساناۋلى كۇندەر قالدى. دايىندىق قالاي؟
- «ەۋروۆيدەنيە» بايقاۋىنا قىزۋ دايىندىق ۇستىندەمىن. كونكۋرستا ورىندايتىن ءانىمنىڭ ءبىرىنشى شۋماعى مەن قايىرماسى اعىلشىن تىلىندە بولعاندىقتان، اعىلشىن ءتىلىنىڭ كۋرسىنا بارىپ ءجۇرمىن.
- «Junior Eurovision Song Contest 2019» بايقاۋىنىڭ بيىلعى قاتىسۋشىلارىن، ياعني ءوزىڭنىڭ قارسىلاستارىڭدى تانيسىڭ با، كوردىڭ بە؟ ولاردىڭ ونەرىن قالاي باعالايسىڭ؟
- قاتىسۋشى بالالاردى ينتەرنەت جەلىسىنەن عانا قاراپ، سىرتتاي تانىپ ءجۇرمىن. ارينە، قارسىلاستارىم وڭاي ەمەس. ءبارى تالانتتى. بارلىعىنىڭ ورىندايتىن ءانى ادەمى.
- بايقاۋدان نە كۇتەسىڭ؟
- ارينە، بارلىعى جەڭىستەن ۇمىتتەنەدى عوي. تىم بولماسا، ۇزدىك ۇشتىكتىڭ قاتارىنان كورىنسەم، سونىڭ ءوزى - مەن ءۇشىن ۇلكەن جەڭىس. بۇل جارىسقا ەلىمنىڭ اتىنان بارا جاتقاندىقتان، ۇلكەن ابىرويمەن ءانىمدى ورىنداپ شىقسام، جەڭىس تۇعىرىنان كورىنسەم دەگەن ارمانىم مەن ماقساتىم بار.
P. S. قازاقستان 2019 -جىلدىڭ 24- قاراشاسىندا پولشانىڭ گليۆيتسە قالاسىندا وتەتىن حالىقارالىق «Junior Eurovision Song Contest» ءان بايقاۋىنا ەكىنشى رەت قاتىسادى. 9-14 جاس ارالىعىنداعى ورىنداۋشىلار قاتىساتىن «Eurovision» انالوگىندا ەلىمىزدى ەرجان ماكسيم تانىستىرادى. قازاقستاننىڭ اۋماعىندا بايقاۋدى «حابار» تەلەارناسى ترانسلياتسيالايدى. «حابار» اگەنتتىگى 2016 -جىلعى 1 - قاڭتاردان باستاپ ءىس- شارانى ۇيىمداستىراتىن ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى سانالادى، بۇل مۇشەلىك اتالعان بايقاۋعا قاتىسۋ ءۇشىن ەلدەن ۇمىتكەر ۇسىنۋعا مۇمكىندىك بەردى.
