قازاقستان كورسەتكىشتەر ءوسىمى بويىنشا ۇزدىك ون ەلدىڭ قاتارىنا ەندى
كومپانيانىڭ مالىمەتىنشە، كەز كەلگەن ەلدىڭ برەندى مەملەكەتتىڭ ابىروي- بەدەلىنە، كەلەشەگىن بولجاي بىلۋىنە، ەلدىڭ بايلىعىنا، باسەكەگە قابىلەتىنە ايتارلىقتاي ىقپال ەتەدى. بيىلعى زەرتتەۋ جۇمىسى دامۋشى ەلدەردىڭ ۇلتتىق برەندتەرى دامىعان ەلدەرگە قاراعاندا قارقىندى تۇردە وركەندەپ كەلە جاتقانىن كورسەتكەن. ماسەلەن، دامۋشى ەلدەردە برەند قۇنىنىڭ ورتاشا ءوسىمى 13,9 پايىزدى كورسەتسە، دامىعان ەلدەردە 0,4 پايىزدىق وسىمگە جەتكەن.
«رەيتينگ 100 ەلدى ساراپتايدى. الەمدەگى ەڭ قىمبات برەندتەر كوشىن – ا ق ش، قىتاي جانە گەرمانيا ساقتاپ قالدى. ا ق ش- تىڭ برەند قۇنى 27,8 تريلليون ا ق ش دوللارىن قۇراسا، قىتاي - 19,5 تريلليون ا ق ش دوللارى، گەرمانيا - 4,9 تريلليون ا ق ش دوللارىنا جەتكەن. ەڭ قىمبات برەندى بار العاشقى ەلدەردىڭ بەستىگىن جاپونيا (4,5 تريلليون ا ق ش دوللارى) جانە ۇلى بريتانيا (3,9 تريلليون ا ق ش دوللارى) تۇيىندەيدى.
سونىمەن قاتار العاشقى وندىققا فرانسيا، ءۇندىستان، كانادا، وڭتۇستىك كورەيا جانە يتاليا كىردى. قازاقستان 7 ساتىعا كوتەرىلىپ، جاڭا زەلانديا (45 - ورىن) مەن يران (43 - ورىن) اراسىندا 44- ورىنعا (2018 -جىلى - 51 - ورىن) يە بولدى. ايتا كەتۋ كەرەك، قازاقستاننىڭ برەند قۇنى كەيبىر ەۋروپا ەلدەرىنەن (مىسالى، پورتۋگاليا، رۋمىنيا، ماجارستان، سلوۆاكيا جانە باسقالارى) گورى جوعارى» دەلىنگەن حابارلامادا.
ەۋرازيالىق ەكونوميكالىق وداق ەلدەرى اراسىندا رەيتينگكە 14- ورىنمەن رەسەي (2018 -جىلى 18- ورىن) كىرەدى.
«ۇلتتىق برەندتەردىڭ رەيتينگىن ءتۇزۋ كەزىندە ەكونوميكالىق، دەموگرافيالىق جانە ساياسي فاكتورلار، ونىڭ ىشىندە ينۆەستيتسيالىق كورسەتكىشتەر، تۋريستىك تارتىمدىلىق، زەرتتەلەتىن ەلدەردىڭ ەكونوميكالىق ءوسۋ ديناميكاسى، ۇلتتىق تاۋارلار مەن قىزمەتتەردىڭ ءوندىرىسى، تۇتىنىلۋى مەن ەكسپورتى، ادام كاپيتالى جانە باسقا دا ءتورت سەگمەنتكە بىرىكتىرىلگەن پارامەترلەر ەسكەرىلەدى»، - دەپ حابارلايدى اقپارات كوزى.
ايتا كەتەرلىگى، بيىلعى رەيتينگتە قازاقستان ۇلتتىق برەند قۇنىنىڭ ءوسىمى بويىنشا ۇزدىك ون ەلدىڭ قاتارىنان كورىنىپ وتىر. ءبىزدىڭ ەلدىڭ برەند قۇنى 41,9 پايىزعا ءوسىپ، ءوسىمى جوعارى وندىق ىشىندە سەگىزىنشى ورىنعا تابان تىرەگەن. برەند قۇنىنىڭ ءوسىمى جاعىنان گانا ءبىر جىلدا 67,1 پايىزدىق وسىمگە جەتسە، ودان كەيىنگى ورىنداردان ۋگاندا (55,7 پايىز)، پاراگۆاي (55,4 پايىز)، بانگلادەش (53,8 پايىز) جانە مىسىر (50,1 پايىز) كورىنگەن.
اۆتور: ايان بەكەن ۇلى
