ەت ەكسپورتى ىشكى نارىقتاعى باعا وسىمىنە اسەر ەتىپ وتىر - مينيستر

نۇر- سۇلتان. قازاقپارات - قازاقستان ەت ەكسپورتىن ۇلعايتقاننان كەيىن ىشكى نارىقتاعى ءونىم باعاسى ءوسىپ وتىر. بۇل تۋرالى بۇگىن اقوردادا ق ر قاۋىپسىزدىك كەڭەسىنىڭ جانىنداعى ساراپشىلىق كەڭەس وتىرىسىندا اۋىل شارۋاشىلىعى ءمينيسترى ساپارحان وماروۆ ايتتى، دەپ حابارلايدى قازاقپارات ءتىلشىسى.

جيىندا ق ر پرەزيدەنتىنىڭ كومەكشىسى - قاۋىپسىزدىك كەڭەسىنىڭ حاتشىسى قالمۇحانبەت قاسىموۆ مينيستردەن ازىق- تۇلىك ەكسپورتى ىشكى نارىقتاعى باعاعا قانشالىقتى اسەر ەتەتىنىن سۇراعان بولاتىن.

«قازاقستان ەكسپورتتى ۇلعايتۋدا. بۇل جاقسى ءارى دۇرىس. دەگەنمەن كوپتەگەن ساراپشىنىڭ، ونىڭ ىشىندە ۇلتتىق بانك ماماندارىنىڭ پىكىرىنشە، ازىق- تۇلىكتى سىرتقا شىعارۋ ىشكى نارىقتاعى باعانىڭ كوتەرىلۋىنە تۇرتكى بولادى ەكەن. ماسەلەن، ەت، ۇن، جارما... ءسىزدىڭ ويىڭىزشا، ەكسپورت ىشكى نارىق باعاسىنا اسەر ەتە مە؟»، - دەپ سۇرادى ق. قاسىموۆ.

مينيستر ازىق- تۇلىك ەكسپورتى مەن ىشكى نارىقتاعى باعانىڭ اراسىندا بايلانىس بار ەكەنىن جاسىرعان جوق.

«ارينە، ىشكى نارىققا ەكسپورتتىڭ اسەرى بار. ماسەلەن، قازىر ءبىز ەت ەكسپورتىن جاقسى جولعا قويدىق. بۇل رەتتە جاسىراتىن ەشتەڭە جوق. وزبەكستان ءبىزدىڭ ەتىمىزدى الىپ جاتىر. سول سەبەپتى ەلدە ەت باعاسى كوتەرىلىپ كەلەدى. ءبىراق، ەكىنشى جاعىنان ءبىز اۋىل شارۋاشىلىعى ونىمدەرىنىڭ ەكسپورتىنا شەكتەۋ قوياتىن بولساق، ماسەلەن ەت پەن ۇنعا، وندا سىرتقى نارىقتى جوعالتىپ الامىز»، - دەدى س. وماروۆ.

ونىڭ العا تارتقان دەرەگىنە قاراعاندا قازاقستان استىق ەكسپورتىنا شەكتەۋ قويعان كەزدە سىرتقى نارىقتىڭ باسىم بولىگىنەن ايىرىلىپ قالعان.

«قازىر عانا ءبىز ونى بىرتىندەپ قالپىنا كەلتىرىپ جاتىرمىز. سوندىقتان ەڭ الدىمەن اۋىل شارۋاشىلىعى ونىمدەرى كولەمىن ۇلعايتۋىمىز كەرەك. بۇعان قوسا، لوگيستيكا، سالىق سالۋ، الىپساتارلىق سىندى ىشكى ماسەلەلەردى شەشۋگە ءتيىسپىز. ايتالىق، وندىرۋشىلەر ەتتىڭ كەلىسىن 1,5 مىڭ تەڭگەدەن ساتادى. ال سودان كەيىن ول ەت 2,2 مىڭ تەڭگەدەن ساۋدالانادى. بۇل ورايدا الىپساتارلار پايدا تاۋىپ وتىر»، - دەدى ول.

اۆتور: مارلان جيەمباي