اتاۋلى الەۋمەتتىك كومەكتى توقتاتۋ، زاڭسىز الۋ جانە شارا قولدانۋ - مينيسترلىك وكىلى جاۋاپ بەردى
سوڭعى ۋاقىتتا اقشالاي كومەكتى زاڭسىز الۋشىلار تۋرالى اقپارات كەڭىنەن تاراپ، قوعامدا داۋ تۋدىرعان ماسەلەگە اينالدى. وسىعان وراي ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك كومەك ساياساتىن دامىتۋ دەپارتامەنتىنىڭ باسقارما باسشىسى اياجان جانعابىلوۆا ءبىرقاتار سۇراققا جاۋاپ بەردى، دەپ حابارلايدى قازاقپارات ءتىلشىسى.
- وتباسىنىڭ اتاۋلى الەۋمەتتىك كومەكتى زاڭسىز العانى قالاي انىقتالدى؟
- ەڭبەك جانە حالىقتى الەۋمەتتىك قورعاۋ مينيسترلىگى «ە- حالىق» اقپاراتتىق جۇيەسى ارقىلى اتاۋلى الەۋمەتتىك كومەكتىڭ تاعايىندالۋى مەن تولەنۋىنىڭ دۇرىستىعىنا تۇراقتى تۇردە مونيتورينگ جۇرگىزىپ كەلەدى. سونىمەن قاتار، جەرگىلىكتى اتقارۋشى ورگاندار، مۇددەلى مەملەكەتتىك ورگاندارمەن بىرلەسىپ، مونيتورينگ ناتيجەسىندە انىقتالعان فاكتىلەر بويىنشا ۋچاسكەلىك كوميسسيالارمەن بىرگە ءۇي ارالايمىز.
- قانشا ادام وسى كومەك ءتۇرىن زاڭسىز الدى؟ ستاتيستيكا بار ما؟
- «ە- حالىق» اقپاراتتىق جۇيەسى ارقىلى جۇرگىزىلگەن مونيتورينگ ناتيجەلەرى ا ا ك الۋشىلاردىڭ جالعان اقپارات ۇسىنۋىنىڭ 73,8 مىڭ فاكتىسىن انىقتادى. ناتيجەسىندە، بۇگىندە 25,1 مىڭ وتباسىعا تولەم توقتاتىلدى، 5,1 مىڭ وتباسىعا تولەمدەر ۋاقىتشا توقتاتىلدى، 40,5 مىڭ وتباسىعا قايتا ەسەپتەلدى.
852 مالى بار وتباسى الەۋمەتتىك كومەك الىپ كەلگەن
- اتاۋلى الەۋمەتتىك كومەكتى زاڭسىز العانى انىقتالعاننان كەيىن، سوعان دەيىن الىپ كەلگەن قاراجاتتى مەملەكەتكە قايتارعان جاعدايلار بولدى ما؟
- بۇگىنگى تاڭدا زاڭسىز بولىنگەن ا ا ك- ءتىڭ بيۋجەتكە قايتارىمى 307,8 ميلليون تەڭگەنى قۇرادى.
- باسىندا بىرنەشە ءۇي، كولىگى بار ادامدار دا اتاۋلى الەۋمەتتىك كومەك الىپ كەلگەن فاكتىلەردى كەلتىرە الاسىز با؟
- مونيتورينگ ناتيجەلەرى ا ا ك الۋشىلار جالعان اقپارات بەرگەنى انىقتالدى. مىسالى، الماتى وبلىسىندا بىرنەشە ءۇيى بار جەتى جانۇيا وسى جىلدىڭ 11- ماۋسىمىنان باستاپ ا ا ك العان، ءبىراق تەكسەرۋ بارىسىندا بۇل وتباسىنىڭ اتىنا 852 مالى بار فەرما تىركەلگەنى انىقتالدى.
ارتىق تولەنگەن سومالار ەرىكتى تۇردە نەمەسە سوت ارقىلى قايتارىلادى
- اتاۋلى الەۋمەتتىك كومەكتى زاڭسىز العاندارعا قانداي شارا قولدانىلادى؟
- قولدانىستاعى زاڭناماعا سايكەس، ەگەر الۋشى ا ا ك مولشەرىنە اسەر ەتەتىن ءمان-جايلار تۋرالى ۋاقتىلى حابارلاماسا، كومەك مولشەرى كورسەتىلگەن جاعدايلار تۋىنداعان كەزدەن باستاپ قايتا ەسەپتەلەدى، ءبىراق ول تاعايىندالعان كۇننەن ەرتە ەمەس جانە ەگەر ءوتىنىش بەرۋشى ا ا ك- ءنىڭ زاڭسىز تاعايىندالۋىنا اكەپ سوقتىراتىن جالعان اقپارات بەرسە، تولەم ادامعا (وتباسىنا) ا ا ك تاعايىندالعان مەرزىمگە توقتاتىلادى. ارتىق تولەنگەن سومالار ەرىكتى تۇردە، ال باس تارتقان جاعدايدا سوت ارقىلى قايتارىلۋى كەرەك.
ايتا كەتەرلىگى، Egov پورتالىندا، مينيسترلىكتىڭ رەسمي ينتەرنەت-رەسۋرسىندا مارتەبەنى تەكسەرۋ بويىنشا اقپاراتتىق جۇيەگە سۇراۋ جىبەرۋ ءۇشىن ينتەرفەيس ازىرلەندى (ول ءۇشىن ج س ن ەنگىزىپ، سۇراۋ سالۋدى جىبەرۋ قاجەت) جانە ەلەكتروندىق ۇكىمەت پورتالىنىڭ باستى بەتىندە ورنالاسقان «بورىشتىق جۇكتەمەنى تومەندەتۋ بويىنشا باعدارلاماعا قاتىسۋ ءۇشىن مارتەبەنى تەكسەرۋ» ەلەكتروندىق سەرۆيسىنىڭ كومەگىمەن (ول ءۇشىن ە ت س ق قاجەت بولادى).
ەسكە سالا كەتسەك، بۇعان دەيىن 12,6 ميلليون تەڭگە ايلىق تابىسى بار كاسىپكەرگە اتاۋلى الەۋمەتتىك تولەم تاعايىندالعانى تۋرالى جازعان بولاتىنبىز. وتباسىنىڭ ورتاشا كىرىسى ءبىر ادامعا 700 مىڭ تەڭگەدەن استامدى قۇراعان، بۇل – ا ا ك الۋ كريتەريلەرىنەن 34 ەسە جوعارى.
