نۇرلان نىعماتۋلين: قارجى حالىقتىڭ ەڭ ماڭىزدى ماسەلەلەرىن شەشۋگە جۇمسالۋى ءتيىس

نۇر-سۇلتان. قازاقپارات - ءماجىلىس سپيكەرى نۇرلان نىعماتۋلينننىڭ توراعالىعىمەن ءوتىپ جاتقان جالپى وتىرىستا مەملەكەتىمىزدىڭ اكىمشىلىك-اۋماقتىق قۇرىلىسى، مەملەكەتتىك باسقارۋ جۇيەسىن جانە بيۋجەتارالىق قاتىناستاردى جەتىلدىرۋ ماسەلەلەرىنە قاتىستى زاڭ جوباسى ءبىرىنشى وقىلىمدا تالقىلاندى، دەپ حابارلايدى قازاقپارات تومەنگى پالاتانىڭ باسپا ءسوز قىزمەتىنە سىلتەمە جاساپ.

وسى زاڭ جوباسىنىڭ ماڭىزدىلىعىنا ايرىقشا نازار اۋدارعان ن. نىعماتۋلين اسىرەسە، زاڭ جوباسىندا كورسەتىلگەن شاعىن جانە ورتا بيزنەستەن تۇسەتىن كورپورتيۆتىك تابىس سالىعى تۇسىمدەرىن جەرگىلىكتى بيۋجەتكە بەرۋ جايىنا باسا كوڭىل ءبولدى. ءماجىلىس ءتوراعاسى: «شىن مانىندە، وسى كورپوراتيۆتىك تابىس سالىعىن جەرگىلىكتى بيۋجەتكە بەرۋ تۋرالى شەشىم وتە ورىندى، وتە قاجەتتى. ەندى جەرگىلىكتى اتقارۋشى ورگاندار تۇسەتىن بارلىق قارجىنى حالىقتىڭ ەڭ ماڭىزدى ماسەلەلەرىن شەشۋگە جۇمساۋ قاجەت»، - دەي كەلىپ، قاراجات ءتۇستى ەكەن دەپ وڭدى-سولدى باعدارلامالار ويلاپ تاپپاي، قاراجاتتىڭ ءاربىر ازاماتتىڭ يگىلىگىنە ءتيىمدى جۇمسالۋىن قاتاڭ باقىلاۋعا الۋ كەرەكتىگىن اتاپ ءوتتى.

سونداي-اق، پالاتا سپيكەرى اتاپ وتكەندەي، كورپوراتيۆتىك تابىس سالىعىنان تۇسكەن قاراجات ايماق تىنىسىنا سەرپىن بەرىپ قانا قويماي، شاعىن كاسىپكەرلىكتىڭ دامۋىنا دا جول اشۋعا ءتيىس. تالقىلاۋ سوڭىندا ءماجىلىس ءتوراعاسى بۇگىنگى ايتىلعان بارلىق ۇسىنىس-پىكىرلەر ەكىنشى وقىلىمعا دەيىن جان-جاقتى پىسىقتالۋ كەرەكتىگىن تاپسىردى.