ورتالىق ازيا مەملەكەتتەرى ءبىر جىلعا ارنالعان سۋ ءليميتىن بەكىتتى
وتىرىس بارىسىندا ورتا ازيا مەملەكەتتەرىنىڭ باسشىلارى 2019-2020 -جىلدار ارالىعىنداعى ۆەگەتاتسيالىق كەزەڭدە پايدالانىلاتىن سۋدىڭ شەكتەۋلى قورىن بەكىتتى.
مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ 77- وتىرىسىنا قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار ءمينيسترى سەرگەي گروموۆ، قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار مينيسترلىگىنىڭ سۋ رەسۋرستار كوميتەتىنىڭ ءتوراعاسى ارمان تۇرلىبەك، وزبەكستان رەسپۋبليكاسىنىڭ سۋ شارۋاشىلىعى ءمينيسترى شاۆكات حامرايەۆ، تاجىكستان رەسپۋبليكاسى ەنەرگەتيكا جانە سۋ رەسۋرستارى مينيسترلىگى سۋ- ەنەرگەتيكا ساياساتى، عىلىم مەن تەحنيكانى دامىتۋ باسقارماسىنىڭ باستىعى دالەر ابدۋرازوكزودا، تۇرىكمەنستاننىڭ سۋ شارۋاشىلىعى مەملەكەتتىك كوميتەتى ءتوراعاسىنىڭ ورىنباسارى دوۆلەتمۋراد ماممەدوۆ قاتىستى.
جيىندا سىرداريا جانە ءامۋداريا وزەندەرىنىڭ باسسەيندەرى بويىنشا 2019 -جىلعى ۆەگەتاتسيالىق كەزەڭدە سۋ قويمالارى كاسكادتارىنىڭ جۇمىس رەجيمى مەن ليميتتەرىن پايدالانۋ قورىتىندىلارى تالقىلاندى.
كەلىسسوز قورىتىندىسى بويىنشا 2019-2020 -جىلدار ارالىعىندا سىرداريا جانە ءامۋداريا وزەندەرىنىڭ باسسەيندەرى بويىنشا ەلدەردىڭ سۋ الۋ ليميتتەرى مەن سۋ قويمالارى كاسكادتارىنىڭ بولجامدىق جۇمىس رەجيمى بەكىتىلدى.
مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ كەزەكتى 78- وتىرىسى تۇرىكمەنستان استاناسى اشحاباد قالاسىندا 2020 -جىلى وتەدى.
