قازاقستاننىڭ وسىمدىك مايى قاي ەلدەردە سۇرانىسقا يە؟

نۇر-سۇلتان. قازاقپارات – ق ر اۋىل شارۋاشىلىعى ءمينيسترى ساپارحان وماروۆ قازاقستان بۇگىندە وسىمدىك مايىن قاي ەلدەرگە ەكسپورتتاپ جاتقانىن ايتتى، دەپ حابارلايدى قازاقپارات ءتىلشىسى.

«2016-جىلمەن سالىستىرعاندا 2018-جىلى وتاندىق وسىمدىك مايى ەكسپورتى 2,8 ەسەگە، مارگارين ءونىمى 42 پايىزعا ارتتى. كۇنباعىس مايى كوبىنە قىتايعا، تاجىكستانعا، وزبەكستانعا، قىرعىزستانعا ەكسپورتتالادى. راپس پەن زىعىر مايىن نەگىزىنەن قىتاي، ال سويا مايىن وزبەكستان ساتىپ الادى»، - دەدى مينيستر ەلورداداعى «KazOil - 2019» III حالىقارالىق كونفەرەنتسياسىندا.

ونىڭ سوزىنە قاراعاندا، بۇگىندە مايلى داقىلدارعا قاتىستى الەۋەتتى كەڭەيتۋگە ەكپىن قويىلىپ وتىر. وسى ورايدا بيىل مينيسترلىك پەن س ق و اكىمدىگى «سولتۇستىك سوياسى» باعدارلاماسىن جۇزەگە اسىرۋعا كىرىستى.

بۇدان بۇرىن حابارلانعانداي، ەكى جىلدا قازاقستان مايلى داقىلداردى تولىقتاي وڭدەۋ دەڭگەيىنە شىعۋدى جوسپارلاپ وتىر.

«ءداستۇرلى استىق ەگىستەرىن وسىرۋمەن قاتار، قازاقستان مايلى داقىلداردى ءوندىرۋدى ارتتىرىپ كەلەدى. وسىمدىك شارۋاشىلىعىن ءارتاراپتاندىرۋعا باعىتتالعان مەملەكەت ساياساتى مايلى داقىلدار ەگىس القاپتارىن ارتتىرۋعا ەلەۋلى اسەر ەتتى. ەگەر 2009-جىلى مايلى داقىلدار ەگىستەرى 1,2 ميلليون گەكتار بولسا، 2019-جىلى 2,9 ميلليون گەكتارعا جەتتى»، - دەدى مينيستر.