رايسا مۇحامەدياروۆانىڭ ونەر مەن ءومىر اراسىنداعى تارتىسى
اكتريسانىڭ قازاقتىڭ كلاسسيك جازۋشىسى، دراماتۋرگ، ۇلتتىق عىلىم اكادەمياسىنىڭ اكادەميگى عابيت مۇسىرەپوۆتىڭ ءۇشىنشى جارى بولعانىن ءبىرى بىلسە، ءبىرى بىلمەيدى. كورەرمەنگە «مەنىڭ اتىم - قوجا» فيلمى ارقىلى جاقسى تانىس مايقانوۆا اپاي مەن جازۋشى عابيت مۇسىرەپوۆتىڭ ماحاببات حيكاياسى جايلى Tengrinews.kz ءتىلشىسى باياندايدى.
رايسا ءماجيت قىزى 1939 -جىلى 11 -شىلدەدە سەمەي وبلىسى كوكپەكتى اۋىلىندا تۋعان. اكتريسانىڭ اكەسى ءماجيت مۇحامەدياروۆ بايلانىس باسقارماسىندا پوشتا باستىعى بولىپ جۇمىس ىستەسە، اناسى مەڭسۋلۋ ساتۋشى بولىپ قىزمەت ەتكەن. ول 1957-1958 -جىلدارى قازاقستان كومپارتياسى سارىاعاش اۋداندىق كوميتەتىندە حاتشى- ماشينيستى بولعان.
1960 -جىلدان «قازاق فيلم» كينوستۋدياسىنىڭ اكتريساسى بولىپ قىزمەت ەتە باستادى. مۇحامەدياروۆا 1963 -جىلى رەجيسسەر سۇلتان قوجىقوۆتىڭ قازاق كينوسىنىڭ التىن قورىنان ورىن العان «مەنىڭ اتىم - قوجا» فيلمىندە ۇستاز مايقانوۆانىڭ رولىمەن حالىققا كەڭىنەن تانىلدى. كينو الەمىندە 30 عا جۋىق فيلمگە تۇسكەن. اكتريسانىڭ ەرەكشە سىمباتى مەن تالانتتى دارىنىنا قاراپ ونى جاس كەزىندە «قازاقتىڭ دجينا لولوبريدجيداسى» دەپ اتاپ كەتكەن (دجينا لولوبريدجيدا - يتاليالىق اكتريسا).
الپىستى القىمداعان مۇسىرەپوۆ سىمباتتى ارۋعا عاشىق بوپ قالىپ، وزىنەن 37 جاس كىشى رايساعا ۇيلەنگەن. ولار 1964 -جىلى شاڭىراق كوتەرگەن. الايدا اكتريسا مەن جازۋشىنىڭ وتباسىلىق عۇمىرى ۇزاققا سوزىلمادى. ولار اراعا 8 جىل سالىپ اجىراسىپ كەتكەن. ارالارىندا گاۋھار جانە گۇلنار ەسىمدى ەكى قىزدارى بار.
اكتريسانىڭ كينويندۋسترياداعى العاشقى دەبيۋتى - 1961 -جىلى «پەسنيا زوۆەت» فيلمىندەگى ءرولى بولعان.
«ماحابباتتا شەكارا جوق» - عابيت مۇسىرەپوۆتىڭ جارى رايساعا جازعان حاتىنان.
«ماحاببات جوق جەردە - قۋانىش تا جوق» دەگەن. امانسىڭ با، مەنىڭ ەڭ قىمباتتىم، اياۋلىم، جالعىزىم، راەچكا! مەنىڭ وسى حاتىم جاڭا جىل قارساڭىندا سەنىڭ قولىڭا تيسە دەپ ەدىم. ويتكەنى، سەنىڭ بار ويىڭ، كوڭىلىڭ، بۇكىل نازارىڭ مەندە بولسىن دەگەن وي. سەنىڭ حاتىڭدى الىپ، مازاسىزدانىپ وتىرمىن. سوزدەرىڭ قانداي اقىلدى. سەن كۇن سايىن ەسەيىپ، اقىلىڭ تولىسىپ كەلەسىڭ. ساعان جەدەلحات جىبەرىپ، ەكەۋمىز جاڭا جىلدى ماسكەۋدە قارسى الساق دەپ ەدىم، ءبىراق، سەنى جۇمىستان بوساتپاس دەپ ويلادىم. ءدال وسى مينۋتتا سەنى قۇشاقتاپ، ايمالاعىم كەلىپ كەتتى. ءبىزدى افريكاعا جىبەرۋگە دايىنداپ، دارىگەرلەر تەكسەرىپ جاتىر. بەزگەك، سۇزەك، تىرىسقاق اۋرۋلارىنا قارسى ەكپە جاسادى. باسىمىزدان باشپايىمىزعا دەيىن تەكسەرۋدە. دارىگەرلەردىڭ ايتۋى بويىنشا، ازىرگە جۇرەك تە، ءىش-قۇرىلىس تا جاقسى. مۇندا جۇمىس كوپ، ىستىق جەرگە باراتىن بولعاندىقتان، سوعان ءوزىمىزدى ازىرلەپ، ءارى كىتاپحاناعا بارىپ سول ەلدىڭ مادەنيەتىمەن، ادەبيەتىمەن كەڭىرەك تانىسىپ ءجۇرمىن. وسى حاتتى بۇگىنگى سامولەتكە ۇلگەرەيىن دەپ ءماجىلىستىڭ اراسىنداعى ۇزىلىستە جازدىم. ساۋ- سالەمەت بول، كورىسكەنشە، ءوز عابيتىڭ».
رايسا مۇحامەدياروۆا «چەمپيون» فيلمى، 1979 -جىل
مۇحامەدياروۆا مەن مۇسىرەپوۆ نەلىكتەن ايىرىلىسقان؟
اكتريسانىڭ سەرگەي ازيموۆتىڭ «پوزدنيايا ليۋبوۆ كلاسسيكا» دەرەكتى فيلمىنە بەرگەن سۇحباتىندا ول مۇسىرەپوۆكە تۇرمىسقا شىققان كەزدە جازۋشىنىڭ ايەلى كوز جۇمعانى جايلى اڭگىمەلەگەن. «ونىڭ جارى دۇنيەدەن وتكەن كەزدە مەنىڭ اياعىم اۋىر ەدى. جۇرەگىمنىڭ تۇبىندە ءالى كۇنگە دەيىن ءوزىمدى كىنالى سەزىنەمىن. مۇمكىن، مەن دە ونىڭ ومىردەن مەزگىلىنەن بۇرىن كەتۋىندە ماڭىزدى ءرول ويناعان شىعارمىن. جەرلەۋدەن كەيىن ول مەنەن: «رايا، نە ىستەيمىز؟» دەپ سۇراعاننان كەيىن، مەن ءبىراز ۋاقىت ءوتۋى كەرەگىن، ءبىراق كوپ كۇتە المايتىنىمدى ايتتىم. سەبەبى بالا نەكەدە تۋعانىن قالادىم»، - دەگەن ەكەن اكتريسا.
رايسا مۇحامەدياروۆانىڭ سوزىنشە، مۇسىرەپوۆ اكتريسانىڭ كينوعا تۇسپەگەنىن قالاعان. «ءبىز سۇلتان قوجىقوۆپەن «قىز جىبەكتىڭ» سەناريىن جازاتىن بولدىق»، - دەدى ماعان.
«مەن تۇسەمىن بە؟» دەپ سۇراعانىمدا، «تۇسەسىڭ»، - دەدى ماعان.
مەنى اكتەرلىك سىناماعا شاقىراتىن كۇندى كۇتىپ ءجۇردىم. ارتىنشا سىنامانىڭ بىتكەنىن ەستىپ، جان دۇنيەمدە ىشتەي ديسكومفورت پايدا بولدى. مەنى ساتىپ كەتكەندەي سەزىم بولدى. ال مەن ساتقىندىقتى جەك كورەمىن. وسىدان كەيىن ارامىز جىلىماي- اق قويدى»، - دەيدى اكتريسا.
عابيت مۇسىرەپوۆ پەن رايسا مۇحامەدياروۆا
وسىلايشا جۇبايلاردىڭ اراسىنان «قارا مىسىق وتكەن». اكتريسا بەس جىل بويى ۇيدە وتىرىپ، بالا تاربيەسىمەن اينالىسقان. الايدا اكتريسا بۇعان شىداي المايتىنىن ايتىپ، مۇسىرەپوۆكە جۇمىسقا شىعاتىنىن ايتقان.
جارىنىڭ قارسىلىعىنا قاراماستان، اكتريسا جاسوسپىرىمدەر تەاترىنا جۇمىسقا ورنالاسقان. اكتريسانىڭ ايتۋىنشا، ولاردىڭ اراسىندا ارانداتۋشىلار كوپ بولعان.
ءتىپتى «60 جاستا بالالى بولۋ مۇمكىن ەمەس» دەپ، مۇسىرەپوۆتىڭ جۇرەگىنە كۇدىك ۇيالاتقان. مۇحامەدياروۆا قانشا دالەلدەپ، تىرىسقانىمەن، ءبارى بوس بولعان.
«مەنىڭشە، ءبىزدىڭ ماحابباتىمىزدىڭ جالىنى ءسوندى. ءبارى جاقسى سياقتى كەيىپ جاساماي- اق قويايىق. مەن ەكىجۇزدەنە المايمىن»، - دەگەن ەكەن مۇحامەدياروۆا مۇسىرەپوۆكە.
رايسا مۇحامەدياروۆا «مەنىڭ اتىم - قوجا» فيلمى، 1963 -جىل
اكتريسا مۇسىرەپوۆپەن بولعان ماحاببات وقيعاسىنان كەيىن ەشكىمدى سۇيە الماعانىن ايتقان. بار ويى - ەكى قىزدى ءوسىرىپ، جەتكىزۋ بولعان ەكەن. ال جازۋشى اجىراسقاننان كەيىن ماشينيست قىزعا ۇيلەنگەن. «ءبىراز ۋاقىت وتكەننەن كەيىن ول بىزگە كەلىپ ءجۇردى.
مەن ىشتەي «رايا، مەن ساعان ورالامىن» دەگەن ءسوزىن كۇتىپ ءجۇردىم. سولاي دەگەن بولسا، ءاپ-سەتتە كۇتىپ الار ەدىم. ول دا، مەن دە ايتقان جوقپىز. ەكەۋمىز دە مەنمەن ەدىك»، - دەيدى اكتريسا.
