ۋكراينا رەسەيدەن اسكەري كەمەلەرىن قايتارىپ بەرۋدى تالاپ ەتتى

نۇر-سۇلتان. قازاقپارات - ۋكراينا سىرتقى ىستەر مينيسترلىگى بىلتىر قاراشا ايىندا قارا تەڭىزدە باسىپ الىنعان ۋكراينا اسكەري تەڭىز كۇشتەرىنىڭ كەمەلەرىن قايتارۋدى تالاپ ەتىپ، رەسەيگە نوتا جولدادى.

بۇل اقپاراتتى ۋكراينا سىرتقى ىستەر مينيسترلىگىنىڭ باسشىسى ۆاديم پريستايكو كيەۆتە ەستونيا سىرتقى ىستەر ءمينيسترى ۋرماس رەينسالمەن بىرگە باسپا ءسوز كونفەرەنسياسىن وتكىزگەن كەزدە تاراتتى.

ۋكراينا جولداعان نوتادا كەمەلەردىڭ كوورديناتتارى مەن قايتارىلاتىن ۋاقىتىن كورسەتۋ تالاپ ەتىلگەن.

ۋكراينا سىرتقى ىستەر ءمينيسترىنىڭ ورىنباسارى ەلەنا زەركال فەيسبۋك پاراقشاسىندا ۋكراينا رەسەيگە بۇرىن دا وسىلاي جەتى رەت تالاپ قويعانىمەن جاۋاپ الماعانىن جازدى.

بىرىككەن ۇلتتار ۇيىمىنىڭ تەڭىز قۇقىعى بويىنشا حالىقارالىق تريبۋنالى بيىل مامىردا رەسەيدى ۋكراينا كەمەلەرىن قايتارۋعا مىندەتتەيتىن قاۋلى العان. الايدا ماسكەۋ بۇل جاعدايدا تريبۋنالدىڭ زاڭدىق كۇشى جوق دەپ ەسەپتەيتىنىن بىلدىرگەن. ماسكەۋ ۋكراينا كەمەلەرى رەسەيدىڭ تەڭىزدەگى شەكاراسىن بۇزدى دەپ سانايدى.

2018-جىلى 25- قاراشادا رەسەي شەكاراشىلارى ۋكراينانىڭ كەرچ بۇعازى ارقىلى ازوۆ تەڭىزىنە وتپەك بولعان «بەرديانسك» جانە «نيكوپول» اتتى كاتەرلەرى مەن «يانى كاپۋ» بۋكسيرىن توقتاتقان ەدى. كەمەنىڭ 24 اسكەري قىزمەتكەرى قاماۋعا الىندى. ولار 9 اي ماسكەۋ يزولياتورىندا وتىرىپ، قىركۇيەكتىڭ باسىندا ۋكراينا مەن رەسەيدىڭ «35 كە 35» فورمۋلاسىمەن جاسالعان ايىرباس كەزىندە قايتقان. الايدا اسكەري كەمەلەر رەسەي قولىندا قالعان.

«ازاتتىق»