ەلوردادا گاز تاراتۋ جەلىلەرىنىڭ قۇرىلىسى باستالدى

بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قالا اكىمىنىڭ ورىنباسارى ەرمەك قيزاتوۆ ايتتى، دەپ حابارلايدى قازاقپارات ءتىلشىسى.

«گازداندىرۋ جۇمىسى ەكى باعىتتا جۇزەگە اسادى. ءبىرىنشى باعىت بويىنشا قالالىق ءوندىرىس جانە تۇرعىن الاپتارىن گازداندىرۋ جەلىسى سالىنادى، ەكىنشىسى – ج ە و-1 جانە ج ە و-2 -جىلۋ ورتالىقتارىنا گاز بەرۋ»، - دەيدى ەرمەك قيزاتوۆ.

ونىڭ ايتۋىنشا، قۇرىلىس جۇمىستارى 3 كەزەڭگە بولىنگەن.

«ءبىرىنشى كەزەڭدە، ياعني 2019-2020 -جىلدار ارالىعىندا «كوكتال-1»، «كوكتال-2»، جەلەزنودوروجنىي، وڭتۇستىك- شىعىس تۇرعىن الاپتارى مەن پرومىشلەننىي كەنتىنە گاز تارتىلادى. بۇل جۇمىستار كەلەسى جىلى اياقتالاتىنىنا سەنىمدىمىز»، - دەيدى اكىم ورىنباسارى.

ونىڭ ايتۋىنشا، قۇرىلىستىڭ ەكىنشى كەزەڭى - 2020-2023 -جىلدار ارالىعىندا جۇرگىزىلەدى. سونىڭ اياسىندا ينتەرناتسيونالنىي، كۇيگەنجار، تەلمان تۇرعىن اۋداندارى مەن پريگورودنىي، Garden Village, Famili Village قالاشىقتارىنا گاز تارتىلادى.

«ءۇشىنشى كەزەڭ 2020-2023 -جىلى جۇزەگە اسىرىلىپ، يلينكا، شۇبار، ءوندىرىس اۋداندارىنا گاز قۇبىرى تارتىلادى»، - دەيدى ول.

اۆتور: زارينا قاھارمان