وڭتۇستىك كورەيادا زاڭسىز جۇرگەن قازاقستاندىقتاردىڭ سانى ازايىپ كەلەدى - س ءى م

نۇر- سۇلتان. قازاقپارات – ق ر س ءى م رەسمي وكىلى ايبەك سمادياروۆتىڭ ايتۋىنشا، قازاقستاندىقتاردىڭ وڭتۇستىك كورەيا اۋماعىندا ماۋسىمدىق جۇمىس ىستەۋىنە رۇقسات بەرۋ بويىنشا كەلىسسوز ەندى باستالعان، دەپ حابارلايدى قازاقپارات ءتىلشىسى.

«وزدەرىڭىز بىلەتىندەي، پرەزيدەنت ءتيىستى تاپسىرما بەرىپ، قازاقستان مەن وڭتۇستىك كورەيا اراسىندا ماۋسىمدىق جۇمىستاردى جۇرگىزۋگە رۇقسات بەرىلسىن دەگەن بولاتىن. ول ماسەلە ءالى باستاپقى دەڭگەيدە. سوندىقتان، قازىر كورەيا تاراپىمەن بۇل ماسەلە بويىنشا جۇمىس ىستەپ جاتىرمىز. ازىرگە ايتارلىقتاي اقپارات جوق. كەلىسسوز ەندى باستالدى»، - دەدى ايبەك سمادياروۆ ۆەدومستۆودا وتكەن بريفينگ بارىسىندا.

ق ر س ءى م رەسمي وكىلىنىڭ ايتۋىنشا، وڭتۇستىك كورەيادا زاڭسىز جۇرگەن قازاقستاندىقتاردىڭ سانى ازايىپ كەلەدى.

وڭتۇستىك كورەيادا قازاقستان ازاماتتارى اۋىل شارۋاشىلىعى سالاسىندا زاڭدى تۇردە جۇمىس ىستەۋى مۇمكىن ەكەنى بۇعان دەيىن حابارلانعان بولاتىن.

اۆتور ايان بەكەن ۇلى