ءامىر بايعازيننىڭ فيلمى «ماسكەۋ پرەمەراسىنىڭ» باستى ەكى جۇلدەسىن جەڭىپ الدى

نۇر-سۇلتان. قازاقپارات - رەسەي استاناسىندا «ماسكەۋ پرەمەراسى» حالىقارالىق كينوفەستيۆالىنىڭ جەڭىمپازدارىن ماراپاتتاۋ سالتاناتى بولدى، دەپ حابارلايدى «قازاقپارات» ح ا ا قازاقستاننىڭ رەسەيدەگى ەلشىلىگىنە سىلتەمە جاساپ.

ءامىر بايعازيننىڭ «رەكا» فيلمى بايقاۋدىڭ گران-ءپريىن جەڭىپ الدى.

«ماسكەۋ پرەمەراسى» فەستيۆالى 29- قازاننان 3- قاراشاعا دەيىن «گوريزونت» كينوتەاترىندا بولدى. وعان قازاقستان، ارمەنيا، قىرعىزستان، مولدوۆا، ۋكراينا، گرۋزيا، لاتۆيا، ەستونيا، رەسەي ەلدەرىنىڭ كينوماتوگرافتارى قاتىستى.

فەستيۆال اياسىندا تولىق مەتراجدى جانە قىسقا مەتراجدى فيلمدەردىڭ بايقاۋى بولدى ءارى «حالىقتار دوستىعى» سيكلىندە بۇرىنعى ۇزدىك فيلمدەر، بىرلەسە شىعارىلعان كينولار كورسەتىلدى.

فەستيۆالدا نەگىزگى قازىلار القاسىنان بولەك، رەسەي كينوكلۋبتارىنىڭ قازىلار القاسى دا كارتينالارعا باعاسىن بەرىپ وتىردى. بۇعان دەيىن 75- ۆەنەتسيا كينوفەستيۆالىندە «كوكجيەكتەر» باعدارلاماسىنىڭ «التىن ارىستان» جۇلدەسىن جەڭىپ العان «رەكا» فيلمىن ولار دا ۇزدىك دەپ تانىدى.

قازاقستان اتىنان سەرگەي دۆورتسيەۆويدىڭ «ايكا» جانە ءادىلحان ەرجانوۆتىڭ «ريەلتور» فيلمدەرى بايقاۋدان تىس كورسەتىلىم اياسىندا كورەرمەندەرگە ۇسىنىلدى.

قىسقا مەتراجدى فيلمدەر بايقاۋىنا جاس رەجيسسەرلار ەلدار شيبانوۆتىڭ «زووپارك» جانە شۇعىلا سەرجاننىڭ «سامال» فيلمدەرى قاتىستى.