قازاقستاندىق سۋرەتشى ۇلى بريتانيادا باس جۇلدە الدى

لوندون. قازاقپارات - ۇلىبريتانيادا قازاقستاندىق سۋرەتشى ءۇريا دجۋريك The London Ultra ارت- ينستاللياتسيالار كورمە- بايقاۋىندا باس جۇلدە مەن اقشالاي سىيلىققا يە بولدى، دەپ حابارلايدى قازاقپارات ءتىلشىسى.

The London Ultra - زاماناۋي كوركەم يدەيالاردىڭ توعىساتىن جەرى. مۇندا مينيماليستىك كومپوزيتسيالاردان باستاپ، ءساندى ينستاللياتسيا جانە تاڭداي قاقتىرارلىق ابستراكسياعا دەيىن بار. شاراعا جىل سايىن الەمنىڭ تۇكپىر- تۇكپىرىنەن ونەر ادامدارى كەلىپ، باقتارىن سىنايدى. بيىل ءۇريانىڭ كورمەگە ەكىنشى رەت قاتىسۋى. ول ادەتتەگىدەي كوشپەندىلەرگە ەتەنە تانىس ماتەريال - مالدىڭ تابيعي جۇنىنەن مۇسىندەر جاسايدى.

سۋرەتشىنىڭ بيىلعى ينستاللياتسياسى تامىر مەن جۇيكە تالشىقتارىن ەسكە سالادى. وسىلايشا اۆتور كورەرمەننىڭ نازارىن ادامزاتتىڭ بۇگىنگى كوكەيكەستى ماسەلەلەرىنە اۋدارتقىسى كەلەدى.

«حالىق تەحنولوگيالىق جانە ەكونوميكالىق پروگرەسس كوشىنە ىلەسەمىن دەپ، تابيعاتپەن جانە بۇكىل الەممەن بايلانىسىن جوعالتىپ جاتىر. ءتىپتى ءبىر- بىرىمىزدەن دە الشاقتاپ بارامىز. ياعني، بۇل تەحنولوگيالار ءبىزدى بىرىكتىرىپ قانا قويمايدى، سونىمەن بىرگە اجىراتادى. ادامدار الەۋمەتتىك جەلىلەردەگى ادەمى فوتوسۋرەتتەرىنىڭ ارتىنا تىعىلىپ، وزدەرىنىڭ جالعىزسىراپ قالعاندارىن سەزبەي دە قالعانداي» ، - دەيدى سۋرەتشى.

سىنشىلار بولسا، ونىڭ بۇل ەڭبەگىنە جوعارى باعا بەرىپ وتىر.

«ءۇريانىڭ بۇل جۇمىسى ماعان ەرەكشە اسەر ەتتى. ول باسقالارعا مۇلدەم ۇقسامايدى. كەڭىستىكتى، تۇستەردى، تەكستۋرانى وتە ءساتتى پايدالانعان» ، - دەدى بىزبەن سۇحباتىندا ارت- اگەنت بيللي وراففەررتي.

The London Ultra كورمە- كونكۋرسىنىڭ ۇيىمداستىرۋشىلارى الەمنىڭ جۇزدەگەن ەلىنەن كەلگەن قاتىسۋشىلاردىڭ اراسىنان قازاقستاندىق سۋرەتشىنىڭ ەڭبەگىن ەڭ ۇزدىك دەپ باعالاپ، باس جۇلدە جانە 1000 ستەرلينگ فۋنتىن تابىس ەتتى. ۋريا ءوز جۇمىستارىندا كوشپەندىلەردىڭ ەجەلگى ماتەريالى - ءجۇندى پايدالانۋ ارقىلى قازاقستاننىڭ اتىن بەدەلدى حالىقارالىق كورمەلەردە پاش ەتۋدى جالعاستىرا بەرمەك.