وزبەكستانداعى قازاقستان جىلى: تاشكەنتتە ماقپال ءجۇنىسوۆا جەكە كونسەرت بەرەدى

نۇر-سۇلتان. قازاقپارات - «قازاق كونسەرت» مەملەكەتتىك كونسەرتتىك ۇيىمىنىڭ ونەر ۇجىمدارى ەل وڭىرلەرىنە كەرەمەت تارتۋ جاساماق، دەپ حابارلايدى قازاقپارات.

60 جىلدىق تاريحى بار «قازاق كونسەرت» ۇيىمىنىڭ «Astana sazy» جانە «Saz&soul»  انسامبلدەرى حالىق ءسۇيىپ تىڭدايتىن تاڭداۋلى تۋىندىلار مەن جاڭا شىعارمالاردان تۇراتىن «قازاق كونسەرت شاقىرادى» كونسەرتىن ۇسىنادى. ەكى ءانسامبلدىڭ بىرلەسكەن كونسەرتىنە ەلىمىزدىڭ تالانتتى مۋلتي ينسترۋمەنتاليست مۋزىكانتتارى، قازاق مۋزىكاسىنىڭ دامۋىنا جاڭاشا لەپ اكەلگەن كومپوزيتورلار باۋىرجان اقتايەۆ پەن ءادىلجان تولىقپايەۆ جەتەكشىلىك ەتەدى.

«قازاق كونسەرت» ۇجىمدارى قازاقتىڭ ءداستۇرلى مۋزىكاسى مەن ەسترادا ونەرى شەبەر ۇيلەسىم تاپقان، ۇلى دالانىڭ كونە مۋزىكالىق سارىندارى زاماناۋي جاڭا فورماتتا جاڭعىراتىن ەرەكشە كونسەرتتى ۇسىنادى.

كونسەرتتە حالىق اندەرى، قۇرمانعازى، اقان سەرى، جاياۋ مۇسا، ن. تىلەنديەۆ، ج. جابايەۆ، ك. ازىربايەۆ، ا. قورازبايەۆتىڭ بەلگىلى كومپوزيتسيالارى جاڭا فورماتتا ورىندالادى. قوس انسامبلمەن بىرگە ساحنادا قازاق كونسەرت سوليستەرى ەربولات شالدىبەكوۆ جانە قايرات سارىبايەۆ ونەر كورسەتپەك. ونەر سۇيەر قاۋىم قازاق مۋزىكاسىنىڭ ۇلىلىعىن، ۇلى دالامىزدىڭ كەڭدىگىن پاش ەتەتىن سازدى اۋەندەردى تىڭداي الادى.

ونەر يەلەرىن العاش بولىپ الماتى قالاسىنىڭ جۇرتشىلىعى قارسى الادى. الماتى قالاسىنداعى كونسەرت 2- قاراشا كۇنى قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ كونسەرت زالىندا وتەدى. ودان كەيىن گاسترولدىك كەرۋەن شىمكەنت قالاسىندا جالعاسىن تابادى. شىمكەنت قالاسىنىڭ ونەر سۇيەر قاۋىمى «قازاق كونسەرت شاقىرادى» كونسەرتىن 4- قاراشا كۇنى ءشامشى قالداياقوۆ اتىنداعى وبلىستىق فيلارمونيادا تاماشالاي الادى.

«ونەردىڭ وزىق ۇلگىلەرىن حالىققا قولجەتىمدى ەتۋ ماقساتىندا «قازاق كونسەرت شاقىرادى» كونسەرتى تەگىن وتكىزىلەدى. بۇعان قوسا، كونسەرت كورەرمەندەرگە تەك رۋحاني ازىق سىيلاپ قانا قويماي، كاسىبي جاس مۋزىكانتتارعا دا جاقسى تالىمگەرلىك ۇلگى بولماق. قازاق كونسەرتتىڭ رەسپۋبليكا وڭىرلەرىندەگى گاسترولدىك ساپارى حالىقارالىق گاسترولدەرگە جالعاسپاق. ق ر مادەنيەت جانە سپورت مينيسترلىگىنىڭ قولداۋىمەن وتەتىن وسى ۇلكەن گاسترولدىك ساپاردىڭ سوڭعى نۇكتەسى - تاشكەنت قالاسى»، - دەدى «قازاق كونسەرت» ۇيىمىنىڭ ديرەكتورى جەڭىس سەيدۋللا ۇلى.

وزبەكستانداعى قازاقستان جىلى اياسىندا تاشكەنت قالاسىنىڭ كورەرمەندەرىن قازاق كونسەرت ءسوليسى، قازاقستاننىڭ حالىق ءارتىسى ماقپال ءجۇنىسوۆا جانە «Astana sazy» مەن «Saz&soul» انسامبلدەرى ءوز ونەرىمەن قۋانتپاق.