بۇرىنعى پرەزيدەنتتىڭ ۇلى ءوزى باسقاراتىن كومپانيانى بيلىك تارتىپ الۋعا ارەكەت ەتىپ جاتقانىن جايىپ سالدى

نۇر-سۇلتان. قازاقپارات – قىرعىزستاننىڭ ەكس-پرەزيدەنتى المازبەك اتامبايەۆتىڭ ۇلى سەيتبەك اتامبايەۆ بيزنەس- ومبۋدسمەن روبين ورد-ءسميتتىڭ اتىنا اشىق حات جازىپ، ءوزى باسقاراتىن كومپانياسىن تارتىپ الۋعا ارەكەت ەتىپ جاتقانىن ايتتى دەپ حابارلايدى ورتالىق ازيانىڭ جاڭالىقتار قىزمەتى.

سەيتبەك اتامبايەۆ بۇل ارەكەتتى ەلدىڭ بۇرىنعى پرەزيدەنتىنىڭ ۇلى رەتىندە «ساياسي قۋعىندالۋ» دەپ باعالايتىنىن اتاپ وتكەن.

سەيتبەك ۇندەۋىندە ءوزى باسقاراتىن كومپانيانىڭ ەشقاشان مەملەكەتتىك تەندەرلەرگە قاتىسپاعانىن، قاراپايىم تۇتىنۋشىلارعا ەمەس، تەك ءىرى كاسىپورىنداعا عانا ەلەكتر ەنەرگياسىن جەتكىزىپ كەلگەنىن مالىمدەدى.

ول سونىمەن بىرگە ەشقانداي ساياسي پارتياعا مۇشە ەمەس ەكەنىن جەتكىزدى.

«پرەزيدەنت سوورونباي جەەنبەكوۆ كۇش قۇرىلىمدارىنان جەكە بيزنەستى تەكسەرۋدى توقتاتىڭدار دەپ تالاپ ەتتى. ءبىراق ەلدە كەرىسىنشە ساياسات ءجۇرىپ جاتىر»، - دەدى بۇرىنعى پرەزيدەنتتىڭ ۇلى.

باسىلىمىنىڭ مالىمەتىنشە، 31- قازاندا ول باسقاراتىن «اۆتوماش-ەنەرگو» كومپانياسىنا اسكەري پروكۋراتۋرا قىزمەتكەرلەرى كەلىپ تەكسەرۋ جۇرگىزگەن.

سەيتبەك اتامبايەۆ «اۆتوماش-ەنەرگو» كومپانياسىن 2003-جىلدان بەرى باسقارىپ كەلەدى.