پرەزيدەنتتىڭ الماتىداعى تاپسىرمالارى قوعامنىڭ مۇڭ-مۇقتاجىنا دەر كەزىندە جاۋاپ بەردى - داۋرەن ابايەۆ

نۇر-سۇلتان. قازاقپارات – ق ر اقپارات جانە دامۋ ءمينيسترى داۋرەن ابايەۆ ق ر پرەزيدەنتىنىڭ الماتىنى اباتتاندىرۋ تۋرالى تاپسىرمالارىنا پىكىر ءبىلدىردى، دەپ حابارلايدى قازاقپارات.

«مۇندا قالا قۇرىلىسى ماسەلەلەرىنە ەرەكشە كوڭىل ءبولىندى دەپ ويلايمىن. ونىڭ سەبەبى، قاسىم-جومارت كەمەل ۇلى الماتىدا تۋىپ-وسكەن، جۇمىس ىستەگەن جانە قالانىڭ تاريحىمەن، نەگىزگى ماسەلەلەرىمەن جاقسى تانىس. سوندىقتان، پرەزيدەنتتىڭ وڭتۇستىك استانانىڭ وزەكتى ماسەلەلەرىن ءبىلۋى قالىپتى جايت»، - دەدى مينيستر «حابار» ارناسىنداعى «اشىق ديالوگ» باعدارلاماسىندا.

ونىڭ ايتۋىنشا، ەڭ الدىمەن پرەزيدەنتتىڭ ەكولوگيالىق جاعدايدى جاقسارتۋ تاپسىرمالارى ماڭىزدى.

«قالا باسشىلىعى الدىندا جەس پەن قوعامدىق كولىكتى گازعا اۋىستىرۋ مىندەتى تۇر. الماتىلىقتار ءۇشىن بۇل - وتە وزەكتى ماسەلەلەردىڭ ءبىرى. ەكىنشىدەن، كوشى-قون پوليتسياسى ورگاندارىندا شەتەلدىكتەردى مىندەتتى تىركەۋدى الىپ تاستاۋ بۇكىل ەلىمىزگە قاتىستى جاڭالىق بولدى. بۇل ابدەن ءپىسىپ-جەتىلگەن شەشىم ەدى. ونىڭ ارتىقشىلىعى وتە كوپ. كەز كەلگەن قاعازباستىلىق پروتسەدۋرادان ارىلۋ تۋريستەر مەن ينۆەستورلاردىڭ كوبەيۋىنە ىقپال ەتەدى»، - دەدى د. ابايەۆ.

ۇشىنشىدەن، پرەزيدەنتتىڭ ماس جۇرگىزۋشىلەردى قاتاڭ جازالاۋ تاپسىرماسى وزەكتى بولىپ وتىر.

«قوعام بۇل ماسەلەنى ۇزاق ۋاقىتتان بەرى كوتەرىپ كەلدى، حالىق ادىلدىكتى، قىلمىس پەن جازانىڭ ساي بولۋىن تالاپ ەتتى. جالپى، بۇل تاپسىرمالاردى قوعامنىڭ مۇڭ-مۇقتاجىنا دەر كەزىندە قۇلاق اسۋ دەپ باعالاعان ءجون. «حالىق ۇنىنە قۇلاق اساتىن مەملەكەت» ۇستانىمى - وسى»، - دەدى مينيستر.

ەسكە سالا كەتسەك، 29- قازاندا مەملەكەت باسشىسى قاسىم-جومارت توقايەۆ الماتى قالاسىنا ەكى كۇندىك جۇمىس ساپارى بارىسىندا ءبىرقاتار ماسەلەلەرگە قاتىستى تاپسىرمالار بەرگەن بولاتىن.