ۇيالى بايلانىس ءنومىرىن تىركەۋ ابونەنتتىڭ ءوز قاۋىپسىزدىگى ءۇشىن قاجەت - داۋرەن ابايەۆ
«ۇيالى بايلانىس ابونەنتتەرىنە ءوز ءنومىرىن تىركەۋدى مىندەتتەيتىن زاڭ بار. قازىر سول زاڭنىڭ ورىندالۋىن كورىپ وتىرمىز. راسىندا دا، اقپارات جانە كوممۋنيكاتسيالار مينيسترلىگىن باسقارعاندا وسى ماسەلە بويىنشا بىرنەشە رەت ءتۇسىندىردىم. قازىر بۇل سالاداعى مەملەكەتتىك ساياساتتى سيفرلىق دامۋ مينيسترلىگى جۇرگىزەدى. ءبىراق مەنىڭ بۇل ماسەلە تۋرالى پىكىرىم وزگەرگەن جوق. مەملەكەت مينيسترلىك ارقىلى ابونەنتتەردىڭ ءوزى ءۇشىن ءبارىن رەتكە كەلتىرىپ جاتىر»، - دەدى مينيستر «حابار» ارناسىنداعى «اشىق ديالوگ» باعدارلاماسىندا.
ونىڭ ايتۋىنشا، تىركەلمەگەن نومىرلەردى ءوشىرۋ ءسال ەرتەرەك جۇرگىزىلۋى ءتيىس ەدى، ءبىراق مەملەكەت الدىمەن اقپاراتتىق تۇسىندىرمە جۇمىستارىن جۇرگىزۋدى ۇيعارعان.
«وسىعان قاراماستان، كوپتەگەن ابونەنتتەر بايلانىسسىز قالعاندا عانا قوزعالدى. العاشىندا نارازىلىق كوپ بولدى، ءبىراق ادامدار ءوز اتىنا قانشا ءنومىردىڭ تىركەلگەنىن كورىپ، مەملەكەتتىڭ دۇرىس جۇمىس اتقارىپ وتىرعانىن ءتۇسىندى. ويتكەنى، ۇيالى ءنومىر - مەملەكەتتىك قىزمەتتەرگە، اقشا ترانزاكسياسىنا، تولەمدەرگە رۇقسات بەرەتىن ادامنىڭ جەكە مەنشىگى. ودان بولەك، ادامنىڭ ءوز قاۋىپسىزدىگى ماسەلەسى بار. ەگەر ونىڭ ءنومىرى وزگە ادامنىڭ اتىنا تىركەلسە، ول ءنومىردى ءوشىرىپ تاستاي الادى نەمەسە بالانس شىعارىپ، جەكە دەرەكتەردى الۋى دا عاجاپ ەمەس. ەگەر تۇرعىننىڭ اتىنا ءوز رۇقساتىنسىز ءنومىر تىركەلسە، بۇل ءنومىر قولدانۋشىسى الاياق نەمەسە تەلەفون لاڭكەسى بولىپ شىقسا، تاعى ماسەلە تۋىندايدى. قۇقىق قورعاۋ ورگاندارىنا بارىپ، زاڭعا قايشى ەشتەڭە ىستەمەگەنىن دالەلدەۋ قاجەت»، - دەپ ءتۇسىندىردى د. ابايەۆ.
ەسكە سالا كەتەيىك، 2019-جىلدىڭ 1- قاڭتارىندا قازاقستاندا ابونەنتتىك قۇرىلعىلاردى تىركەۋ پروتسەسى اياقتالعان بولاتىن. بۇل ءموبيلدى تەلەفونداردىڭ ۇرلانۋىنا، الاياقتىققا قارسى كۇرەس ماقساتىندا ىستەلىپ وتىر.
24- قازاندا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ تەلەكوممۋنيكاتسيا كوميتەتىنىڭ ءتوراعاسى ۆيتالي ياروشەنكو ۇيالى بايلانىس قىزمەتىنىڭ ءۇزىلۋ سەبەبىن اتادى.
