دانەليا تولەشوۆا جاڭا انىنە بەينەكليپ ءتۇسىردى
ءانشىنىڭ PR- ديرەكتورى تاتيانا سينەنكونىڭ ايتۋىنشا، ءتۇسىرىلىم جۇمىستارى وتكەن دەمالىستا «قازاق فيلم» كينوستۋدياسىنىڭ ءبىر پاۆيلونىندا جۇرگىزىلگەن. جاڭا تۋىندىنىڭ اۋەنىن دانەليا قازاقستاندىق كومپوزيتور ەركەحان ابدولدايەۆپەن بىرگە جازعان. ال اعىلشىن تىلىندەگى ءماتىنى ۋكراينالىق اقىن يۋليا كابانوۆامەن بىرگە جازىلدى.
كليپتىڭ رەجيسسەرى - وسىعان دەيىن ءبىرقاتار قازاقستاندىق جۇلدىزدارعا بەينەبايان ءتۇسىرىپ ۇلگەرگەن مارات سۆويك، ال پروديۋسەرى - نۇرسۇلۋ سۇلتانوۆا. تۇسىرىلىمگە سونىمەن قاتار ءتۇرلى باعىتتا ەڭبەكتەنىپ جۇرگەن تانىمال قازاقستاندىق جاس بيشىلەر مەن حورەوگرافتار تارتىلدى. ولار كليپتە بەلگىلى ءبىر اتموسفەرانى قالىپتاستىرىپ، ءاننىڭ ءمان-ماعىناسىن ءبي ارقىلى جەتكىزۋگە تىرىستى.
دانەليا رەجيسسەردىڭ كليپتى تىلسىم استارمەن ءتۇسىرۋ تۋرالى يدەياسىن قۋانا قولداپ، ءوز ءرولىن شەبەرلىكپەن ويناپ شىقتى. ول 4 وبرازدى اۋىستىرىپ، ءوزى ءۇشىن بەيتانىس رولدەردى سومداۋعا بارىن سالدى.
«جاڭا ءانىمدى كورسەتىپ قانا قويماي، ەل ۇيرەنگەن وبرازدان باسقا، وزگە قىرلارىممەن جارقىراپ، سول ارقىلى تىڭدارماندارىمدى تاڭعالدىرعىم كەلەدى»، - دەيدى جاس ءانشى.
پروديۋسەر نۇرسۇلۋ سۇلتانوۆانىڭ سوزىنە سەنسەك، ول دانەليانى جاڭا وبرازدا كورسەتۋدى كوزدەگەن.
«بۇرىنعى كىشكەنتاي قىز ەمەس، بويجەتكەن، ءوز مىنەزىن كورسەتۋدەن قورىقپايتىن سۇلۋ بيكەش رەتىندە كورسەتكىمىز كەلدى. ونىڭ ۋاقىت وتكەن سايىن ءوسىپ-جەتىلىپ، ءانشى رەتىندە قالىپتاسۋ كەزەڭىن ءساتتى بەينەلەي بىلدىك دەپ ويلايمىن»، - دەپ اتاپ ءوتتى ول.
كليپتىڭ تيزەرى دايىندالىپ، ءانشىنىڭ Youtube كانالىندا جاريالانعان. ال كليپتىڭ ءوزى تاياۋ كۇندەرى جارىققا شىعادى.
