قوستاناي وبلىسىندا « قىزىل كىتاپقا» ەنگەن قۇستى اتقاندار ۇستالدى

ءىس- شارا بارىسىندا پوليسيا قىزمەتكەرلەرى مەن تابيعاتتى قورعاۋ ۇيىمدارىنان 59 موبيلدىك توپ قۇرىلدى. قىزمەتكەرلەر اڭشىلىق جەرلەرىندە، سۋ ايدىندارىندا جانە ورمان القاپتارىندا تابيعات قورعاۋ زاڭناماسىن بۇزۋدىڭ جولىن كەسۋ جانە انىقتاۋ بويىنشا 1590 نان استام رەيدتىك ءىس- شارا وتكىزدى.

«پوليسيا قىزمەتكەرلەرى زاڭسىز اڭ اۋلاۋ جانە اعاش كەسۋ دەرەكتەرىنە قاتىستى 4 قىلمىستىق قۇقىق بۇزۋشىلىقتى انىقتادى. قوستاناي اۋدانىنىڭ ليماننىي اۋىلىنىڭ ماڭىندا پوليسيا قىزمەتكەرلەرى «ۆاز 2121» اۆتوكولىگىن توقتاتقان. اۆتوموبيل جۇك سالعىشىن تەكسەرۋ كەزىندە ەكى ءسىبىر ەلىگى جانە تىركەۋگە الىنعان ءۇش مىلتىق تابىلدى. بەلگىلى بولعانداي، جولاۋشىلاردىڭ بىرەۋى ەكى ەلىك اتىپ العان» ، - دەلىنگەن وبلىستىق پوليتسيا دەپارتامەنتى باسپا ءسوز قىزمەتىنىڭ اقپاراتىندا.

زاڭسىز اڭ اۋلاۋدىڭ تاعى ءبىر دەرەگى قامىستى اۋدانىندا تىركەلگەن. تالدىكول اۋىلىنان 10 شاقىرىم جەردە رۋدنىي قالاسىنىڭ ەكى تۇرعىنى ۇستالدى. اڭ اۋلايتىن شارۋاشىلىقتا جۇرگەن اڭشىلار 7 قاز اتقان، ولاردىڭ ءبىرى - قىزىل كىتاپقا ەنگىزىلگەن «شيقىلداق قاز» تۇقىمى.

جالپى، اڭ اۋلاۋ ەرەجەلەرىن بۇزعانى ءۇشىن 72 ادام اكىمشىلىك جاۋاپكەرشىلىككە تارتىلدى. بالىق اۋلاۋ ەرەجەلەرىن بۇزعانى ءۇشىن 23 بالىقشى، سونداي- اق 26 اڭشى قارۋدى ساقتاۋ، الىپ ءجۇرۋ جانە تاسىمالداۋ ەرەجەلەرىن بۇزعانى ءۇشىن ايىپپۇل ارقالادى. ايتا كەتەرلىك جايت، جەدەل الدىن الۋ ءىس- شاراسى كەزىندە 700 مىڭ تەڭگەدەن استام اكىمشىلىك ايىپپۇل ءوندىرىلدى.