قىرعىزستاندا اتامبايەۆتىڭ بۇرىنعى كومەكشىسى جەتى جىلعا سوتتالدى

سوت 2017-جىلعى پرەزيدەنت كامپانياسى كەزىندە 150 مىڭ دوللار كولەمىندە اقشا جىمقىردى دەپ ايىپتالعان ءيلميانوۆتى كىنالى دەپ تاپتى. ول تاعىلعان ايىپتاردى جوققا شىعاردى.

سوت بۇعان قوسا، ءيلميانوۆتىڭ مۇلىكتەرىن كامپەسكەلەپ، 160 مىڭ سوم (2,240 دوللار) كولەمىندە ايىپپۇل تولەۋدى مىندەتتەدى.

جوعارى ينستانتسياعا جازعان حاتىندا يلميانوۆ ءوزىنىڭ كىناسى دالەلدەنبەگەنىن، سوتتان دۇرىس شەشىم شىعارۋدى سۇراعان.

قىرعىزستاننىڭ بۇرىنعى پرەزيدەنتى المازبەك اتامبايەۆتىڭ كەڭەسشىسى بولعان يكرامجان يلميانوۆ 2018-جىلى قازان ايىندا رەسەيدىڭ تاتارستان رەسپۋبليكاسىندا ۇستالىپ، كەيىنىرەك قىرعىزستانعا ەكستراديتسيالانعان.

ساراپشىلار ءيلميانوۆتى اتامبايەۆتىڭ ەڭ جاقىن سەرىكتەرىنىڭ ءبىرى دەپ سانايدى. اۋەل باستا اتامبايەۆتىڭ جۇرگىزۋشىسى بولعان يلميانوۆ پرەزيدەنت كەڭەسشىسى قىزمەتىنە دەيىن وسكەن.

قىرعىزستاندى 2011-2017-جىلدار ارالىعىندا باسقارعان 63 جاستاعى المازبەك اتامبايەۆ قازىر قىرعىزستاننىڭ مەملەكەتتىك ۇلتتىق قاۋىپسىزدىك كوميتەتىنىڭ تەرگەۋ يزولياتورىندا وتىر. وعان ارنايى دەپۋتات كوميسسياسى التى ايىپ ارتقان. ونىڭ ىشىندە «المازبەك اتامبايەۆ اتى-شۋلى قىلمىسكەر ءازيز باتۋكايەۆتى زاڭسىز بوساتۋعا ارالاستى»، «بىشكەك جىلۋ ەلەكتر ستانتسياسىن جاڭارتۋ كەزىندە جانە وعان كومىر جەتكىزۋ كەزىندە جەمقورلىققا قاتىستى» دەگەن ايىپتار بار. المازبەك اتامبايەۆ مۇنداي ايىپتاۋلاردىڭ ارتىندا ساياسي ماقسات بار دەپ ەسەپتەيدى.

ىشكى ىستەر مينيسترلىگىنە تەرگەۋگە بارۋعا باس تارتقاندىقتان 7-8- تامىزدا شۋ وبلىسىنىڭ قوي-تاش اۋىلىندا «بۇرىنعى پرەزيدەنت اتامبايەۆتى تەرگەۋگە ماجبۇرلەپ اكەلۋ شاراسى» وتكەن. شارا بارىسىندا ارنايى قىزمەت وكىلى قازا بولىپ، 170 تەن استام ادام جارالاندى، 79 ى - پوليتسيا قىزمەتكەرى.