نازاربايەۆتىڭ شەتەلدىك ساپارلارىنا قانشا قارجى تولەنەتىنى بەلگىلى بولدى

مينيستر بيۋجەتتىك تولەمدەردىڭ ءبارى زاڭ اياسىندا جاسالاتىنىن جەتكىزدى.

ونىڭ ايتۋىنشا، «قازاقستاننىڭ تۇڭعىش پرەزيدەنتى - ەلباسى تۋرالى» ارنايى زاڭ بار.

سوندىقتان ۇلت كوشباسشىسى نۇرسۇلتان نازاربايەۆ قاۋىپسىزدىك كەڭەسى مەن قازاقستان حالقى اسسامبلەياسىن باسقارىپ وتىرعاننان كەيىن ەلدىڭ اتىنان شەتەلدىك ساپارلارعا شىعىپ تۇرادى.

«ماسەلەن، جاقىندا عانا ەلباسى باكۋ قالاسىندا بولىپ، تۇركى تىلدەس ەلدەردىڭ سامميتىنە قاتىستى. جاپونياعا باردى. سول جاقتا جاڭا يمپەراتوردىڭ تاققا وتىرۋ راسىمىنە قاتىستى. تۇڭعىش پرەزيدەنت تۋرالى زاڭعا سايكەس، وسى ساپارلاردىڭ بارلىعىنا بيۋجەت قاراجاتى قاراستىرىلعان»، - دەدى سىرتقى ىستەر ءمينيسترى.

مۇحتار تىلەۋبەردى بيۋجەتتە بارلىق مەملەكەتتىك قىزمەتشىنىڭ ساپارلارىنا قارجى قاراستىرىلعانىن اتاپ ءوتتى. ولاردىڭ قاتارىنا مەملەكەت باسشىسى مەن ۇكىمەت باسشىسى دا كىرەدى.

«بۇگىندە ارنايى كەستە بار. وندا تولەمدەردىڭ ءليميتى كورسەتىلگەن. شامامەن 100 دوللار. ەۋروپا ەلدەرىندە كۇنكورىس دەڭگەيى جوعارى، ول جاقتا 100 دوللار بولسا، ازيا مەملەكەتتەرىندە - 80 دوللار»، - دەپ اتاپ ءوتتى تىلەۋبەردى.

ەسكە سالا كەتسەك، جاقىندا نۇرسۇلتان نازاربايەۆ جاپونيانىڭ يمپەراتورى نارۋحيتونىڭ تاققا وتىرۋ راسىمىنە قاتىستى.

قازاقستاننىڭ تۇڭعىش پرەزيدەنتى سالتاناتتى شاراعا فراك كيىپ باردى.

نازاربايەۆ توكيونىڭ اكىمشىلىك اۋدانىندا تۇردى. ول بوس ۋاقىتىندا ميناتو اۋدانىنىڭ كوشەلەرىمەن سەرۋەندەدى.

ەلباسى جاپونياعا ساپارى بارىسىندا ۋكراينا پرەزيدەنتى ۆلاديمير زەلەنسكيمەن دە كەزدەستى.