شىمكەنتتىك دارىگەرلەر جۇكتى ايەلدىڭ جۇرەگىنە العاش رەت اشىق وتا جاسادى

وتا جاسالعان جۇكتى كەلىنشەككە «1 ءتيپتى قولقانىڭ جەدەل جىرتىلۋى» دياگنوزى قويىلعان. مۇنداي اۋرۋ كارديولوگيا مەن كارديوحيرۋرگيادا سيرەك كەزدەسەدى. ستاتيستيكا مالىمەتتەرىنە سۇيەنەتىن بولساق، مۇنداي دياگنوز قويىلعان پاتسيەنتتەردىڭ %50 جەدەل جاردەم كەلگەنگە دەيىن، قالعانى وتاعا دەيىن ءولىپ كەتەدى. وپەراتسيا كەزىندە كارديوورتالىقتىڭ كارديوحيرۋرگتار كومانداسى جاساندى قان اينالىم جۇيەسىنىڭ كومەگىمەن جۇرەكتى توقتاتىپ قويىپ، قولقا تامىرىنىڭ دوعاسى مەن سۋپراكورونارلىق ايماعىنا پروتەز ورناتتى. ءبىر مەزەتتە جاسالعان ەكى كۇردەلى وتانىڭ ناتيجەسىندە سالماعى 3 كەلىدەن اساتىن ۇل بالا دۇنيەگە كەلدى. دارىگەرلەر انا مەن ءسابيدىڭ بۇگىنگى جاعدايىن جاقسى دەپ باعالاۋدا. كارديوحيرۋرگتار وپەراتسيا كەزىندە انا مەن شاقالاقتىڭ ومىرىنە قاۋىپ تونگەنىن جاسىرمايدى. تاۋەكەلگە بارعان مەديتسينا ماماندارى وتانى ءساتتى جاساپ شىعىپ، ەكى ادامنىڭ ءومىرىن امان الىپ قالدى. ايتا كەتەيىك، وسى ۋاقىتقا دەيىن قالالىق كارديولوگيا ورتالىعىندا قوسارلانعان مۇنداي پاتولوگيامەن جۇكتى ايەلگە وتا جاسالماعان.

«ەلىمىزدەگى رەسپۋبليكالىق ورتالىقتاردا ءبىرلى- جارىم مۇنداي جاعدايلار بولعان. كوپتەگەن جاعدايلاردا سانيتارلىق اۆياتسيا جەلىسى بويىنشا نۇر- سۇلتان قالاسىنداعى ۇعكو رەسپۋبليكالىق ورتالىقتارعا تاسىمالداۋعا ءماجبۇر بولاتىن ەدىك. پاتسيەنتتەردى سانيتارلىق اۆياتسيا جەلىسى بويىنشا تاسىمالداۋ مەملەكەت ءۇشىن شىعىندى، سونىمەن قاتار قولقانىڭ جىرتىلۋىنىڭ اسقىنۋى مەن ءولىم قاۋپى وتە جوعارى. ءبىزدىڭ جاعدايدا پاتسيەنتتىڭ ءحالى تاسىمالداۋعا جارامايدى دەپ باعالانعان. جەدەل تۇردە كونسيليۋم ۇيىمداستىرىلىپ، شىمكەنت قالاسىنىڭ كارديولوگيالىق ورتالىعىندا جەدەل تۇردە وتا جاساۋ قاجەت دەگەن شەشىم قابىلداندى» ، - دەيدى ورتالىقتىڭ ماماندارى.

ەسكە سالايىق، شىمكەنت قالالىق كارديولوگيا ورتالىعىندا اعىمداعى جىلى قولقا تامىرى جىرتىلعان 7 ناۋقاسقا وتا جاسالعان. ناتيجەلەرى قاناعاتتانارلىق دەپ باعالانعان.