ەلوردادا الداعى ۋاقىتتا قانداي ايتۋلى عيماراتتار بوي كوتەرەدى

«ايتۋلى عيماراتتاردىڭ ءبىرى - قازاق دراما تەاترى. ول مىڭجىلدىق اللەياسىندا ورنالاسقان. دراما تەاتردىڭ قۇرىلىسىن 2021 -جىلدىڭ باسىندا اياقتاۋ كوزدەلگەن. تاپسىرىس بەرۋشى: «قۇرىلىس نىساندارى بويىنشا كومپانيا» كورپوراتيۆتىك قورى. مەردىگەر: «Mabco Constructions SA» فيرماسىنىڭ استانا فيليالى» ، - دەپ جاۋاپ بەرىلدى قازاقپارات اگەنتتىگىنىڭ رەسمي ساۋالىنا ەلوردا اكىمدىگىنەن.

اكىمدىكتىڭ حابارلاۋىنشا، ەسىل اۋدانىندا ماڭگىلىك ەل جانە قابانباي باتىر داڭعىلدارىنىڭ قيىلىسىندا جاڭا مەشىت بوي كوتەرەدى. مەشىت قۇرىلىسىن 2021 -جىلدىڭ باسىندا اياقتاۋ جوسپارلانعان. تاپسىرىس بەرۋشى: «استانا-20» مەملەكەتتىك قورى. باس مەردىگەر - Sembol.

«سونىمەن قاتار، تۇران داڭعىلىندا جەڭىل اتلەتيكا مانەجى سالىنىپ جاتىر. ول نىساننىڭ تاپسىرىس بەرۋشىسى - «Samruk Kazyna» ا ق. باس جوبالاۋشى - «ا ب ك قۇرىلىس-1» ج ش س. نىسان قۇرىلىسىن 2020 -جىلى جازدا اياقتاۋ جوسپارلانعان» ، - دەلىنگەن اكىمدىكتىڭ جاۋابىندا.

ەسكە سالا كەتسەك، پرەزيدەنت قاسىم- جومارت توقايەۆ ەلوردانى ودان ارى دامىتۋ ماسەلەلەرى جونىندەگى ماجىلىسىندە قالانىڭ سىرتقى كەلبەتىنە قاتىستى سىن ايتقان بولاتىن.

«ەلوردادا قالا قۇرىلىسىنىڭ ءبىرىڭعاي ساياساتى جوق. بۇل، ءبىرقاتار اۋداندا رەتسىز، بەيبەرەكەت قۇرىلىستارعا الىپ كەلەدى. كوشەلەر مەن عيماراتتاردى راسىمدەۋدىڭ ءبىرىڭعاي ۇيلەسىمدى ءستيلى جوق. سىزدەر ەلوردانى كورۋ ءۇشىن ارنايى كەلگەن تۋريستەردىڭ پىكىرلەرىن ەستىگەن دە شىعارسىزدار. تولىقتاي العاندا، ولار ارينە، وڭ پىكىرلەر. ءبىراق، قالادا ەكلەكتيكانىڭ دا جوقتىعىن اتاپ وتەدى. ءبىر عيمارات ءبىر ستيلدە، ەكىنشىسى باسقا ستيلدە سالىنعان. ەڭ باستىسى، جايلىلىق جوق. پليتالارى ۇشىپ، اسفالت جارىلىپ جاتىر. جاسىل وسكىن از. جالپى، قالانى قاداعالاپ، كۇتىپ ۇستامايتىنداي سەزىم قالىپتاسادى. قوجايىنى جوق» ، - دەگەن ەدى قاسىم- جومارت توقايەۆ.