المازبەك اتامبايەۆتىڭ قاماۋ مەرزىمى تاعى ەكى ايعا ۇزاردى

ونىڭ ادۆوكاتى سەرگەي سلەساريەۆتىڭ ايتۋىنشا، قىلمىستىق توپ جەتەكشىسى ءازيز باتۋكايەۆتىڭ زاڭسىز بوساتىلۋىنا بايلانىستى وتكەن الدىن الا تىڭداۋ كەزىندە سۋديا وسىنداي شەشىم قابىلداعان.

«سوتتا سۋديا بۇل جايلى ايتقان جوق. قولىمىزعا سوت قاۋلىسىن العان كەزدە ءبىر-اق بىلدىك» دەدى سلەساريەۆ ازاتتىقتىڭ قىرعىز قىزمەتىنە.

ادۆوكات جاقىندا بۇرىنعى پرەزيدەنتپەن كەزدەسىپ، الدىن الا سوت وتىرىسىنىڭ قورىتىندىسىن حابارلاعان. ونىڭ ايتۋىنشا، اتامبايەۆتىڭ سوت پروتسەسىنە بايلانىستى ۇستانىمى وزگەرمەگەن.

قازىر شەتەلدە جۇرگەن قىلمىستىق توپ جەتەكشىسى ءازيز باتۋكايەۆتىڭ زاڭسىز بوساتىلۋىنا بايلانىستى قوزعالعان قىلمىستىق ءىس اياسىندا اتامبايەۆتى ىشكى ىستەر مينيسترلىگى ءۇش رەت تەرگەۋگە شاقىرعان، ءبىراق ول كەلۋدەن باس تارتقان.

7-8- تامىزدا شۋ وبلىسىنىڭ قوي-تاش اۋىلىندا «بۇرىنعى پرەزيدەنت اتامبايەۆتى تەرگەۋگە ماجبۇرلەپ اكەلۋ شاراسى» وتكەن. شارا بارىسىندا ارنايى قىزمەت وكىلى قازا بولىپ، ونداعان ادام جارالانعان. بۇل ءىس بويىنشا نەگىزگى سوت وتىرىسى 15- قاراشادا باستالادى.

قىرعىزستاندى 2011-2017-جىلدار ارالىعىندا باسقارعان 63 جاستاعى المازبەك اتامبايەۆ قازىر قىرعىزستاننىڭ مەملەكەتتىك ۇلتتىق قاۋىپسىزدىك كوميتەتىنىڭ تەرگەۋ يزولياتورىندا وتىر. وعان ارنايى دەپۋتات كوميسسياسى التى ايىپ ارتقان. ونىڭ ىشىندە «المازبەك اتامبايەۆ اتى-شۋلى قىلمىسكەر ءازيز باتۋكايەۆتى زاڭسىز بوساتۋعا ارالاستى»، «بىشكەك جىلۋ ەلەكتر ستانتسياسىن جاڭارتۋ كەزىندە جانە وعان كومىر جەتكىزۋ كەزىندە جەمقورلىققا قاتىستى» دەگەن ايىپتار بار.

المازبەك اتامبايەۆ مۇنداي ايىپتاۋلاردىڭ ارتىندا ساياسي ماقسات بار دەپ ەسەپتەيتىنىن ءبىلدىرىپ، پارلامەنتتىڭ ەكس-پرەزيدەنت مارتەبەسىنەن ايىرۋ تۋرالى شەشىمىن كونستيتسياعا ساي ەمەس دەپ باعالاعان.

27- ماۋسىمدا پارلامەنت المازبەك اتامبايەۆتى ەكس-پرەزيدەنت مارتەبەسىنەن ايىرعان. 25- قازاندا قىرعىزستان جوگوركۋ كەنەشىنىڭ كونستيتۋتسيالىق پالاتاسى المازبەك اتامبايەۆتى ەكس-پرەزيدەنت مارتەبەسىنەن ايىرۋدى زاڭدى دەپ تاپتى.

«ازاتتىق»