ۇستاز بەن دارىگەردىڭ جالاقىسى ەلدەگى ورتاشا ايلىقتان جوعارى بولۋى ءتيىس - بەردىبەك ساپاربايەۆ

ساپار بارىسىندا ول مۇعالىمدەر جانە ءبىلىم سالاسىنىڭ باسقا دا قىزمەتكەرلەرىمەن كەزدەستى، دەپ حابارلايدى قازاقپارات ءتىلشىسى.

كەزدەسۋ بارىسىندا پرەزيدەنتتىڭ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى حالىققا جولداۋىندا قويىلعان مىندەتتەردى جۇزەگە اسىرۋ تۋرالى ايتتى.

ۆيتسە-پرەمەر پرەزيدەنتتىڭ تاپسىرماسى بويىنشا پەداگوگتاردىڭ مارتەبەسىن ارتتىرۋ، ولاردى ماتەريالدىق قامتاماسىز ەتۋ دەڭگەيىن جاقسارتۋ جانە ءبىلىم بەرۋ سالاسىنىڭ باسقا دا ماسەلەلەرى شەشىلەتىنىن اتاپ ءوتتى. ءتيىستى زاڭ جوباسى پارلامەنتتە قارالۋدا.

«ءاربىر ەلدىڭ دامۋى ءبىلىم، دەنساۋلىق ساقتاۋ، ازاماتتاردىڭ مادەنيەتىنە بايلانىستى. ءبىزدىڭ بالالارىمىزدىڭ حالىقارالىق ستاندارتتارعا سايكەس ساپالى ءبىلىم الۋى ماڭىزدى. سوندىقتان ءبىز مۇعالىمدەردىڭ مارتەبەسىن، ولاردىڭ ماتەريالدىق قامتاماسىز ەتىلۋىن ارتتىرۋىمىز كەرەك. مەملەكەت باسشىسىنىڭ تاپسىرماسى بويىنشا 4 جىل ىشىندە مۇعالىمدەردىڭ جالاقىسى ەكى ەسەگە ارتادى. كەلەشەكتە ءبىزدىڭ مۇعالىمدەر مەن دارىگەرلەردىڭ جالاقىسى ەل بويىنشا ورتاشا جالاقىدان جوعارى بولۋى ءتيىس»، - دەپ اتاپ ءوتتى ب. ساپاربايەۆ.

سونداي-اق، ۆيتسە-پرەمەردىڭ پىكىرىنشە، مەكتەپ ديرەكتورلارىنىڭ جالاقىسى ساپالى كورسەتكىشتەرگە بايلانىستى بولۋى ءتيىس.

«مىسالى، بۇل مەكتەپتە 4000 بالا، ال كورشى مەكتەپتە 500 بالا وقيدى. جۇكتەمە ءارتۇرلى، ال ديرەكتورلاردىڭ جالاقىسى بىردەي. سونداي- اق، وقۋ ساپاسى، «التىن بەلگى» الاتىن تۇلەكتەرىنىڭ سانى، ءتارتىبى جانە باسقا دا كورسەتكىشتەر ەسكەرىلمەيدى. بۇل ماسەلەلەر جاڭا زاڭدا ەسكەرىلەدى»، - دەدى ۆيتسە-پرەمەر.

سونداي-اق، ۆيتسە- پرەمەر مۇعالىمدەردى جاس ۇرپاققا رۋحاني-ادامگەرشىلىك تاربيە بەرۋ بويىنشا جۇمىستى كۇشەيتۋگە شاقىردى.

«وكىنىشكە قاراي، سوڭعى ۋاقىتتا جاسوسپىرىمدەر اراسىندا سۋيتسيدتەر مەن قۇقىق بۇزۋشىلىقتار سانى وسۋدە. بۇل اتا- انالار مەن مۇعالىمدەردىڭ ءوزارا ءىس- قيمىلىنىڭ ناشارلاعانىن كورسەتەدى. بۇل ماسەلەنى شەشۋدە ءبىز قوعام مەن مەملەكەتتىڭ كۇش-جىگەرىن ۇيلەستىرۋ ءۇشىن قوعامنىڭ نازارىن وسى ماسەلەگە اۋدارعىمىز كەلەدى. لايىقتى ۇرپاقتى تاربيەلەۋ - ءبىزدىڭ ورتاق مىندەتىمىز»، - دەدى بەردىبەك ماشبەك ۇلى.

بۇگىنگى جۇمىس ساپارى بارىسىندا ق ر پرەمەر-ءمينيسترىنىڭ ورىنباسارى حالىقپەن كەزدەسىپ، ءتۇرلى سالاداعى قىزمەتكەرلەرمەن دە جينالىس وتكىزەدى. سونىمەن قاتار، الەۋمەتتىك قىزمەتكەرلەر كۇنىنە وراي مۇمكىندىگى شەكتەۋلى ازاماتتارعا ارنالعان وڭالتۋ ورتالىعىنداعى سالتاناتتى شاراعا قاتىسادى. ساپار اياسىندا بەردىبەك ماشبەك ۇلى شيەلى، جاڭاقورعان اۋداندارىندا دا بولادى دەپ جوسپارلانىپ وتىر.