13:15, 27 - قازان 2019 | GMT +5
بەكبولات راحات اۋىر اتلەتيكادان ازيا چەمپيوناتىندا التىن مەدال جەڭىپ الدى
نۇر-سۇلتان. قازاقپارات - پحەنياندا ءوتىپ جاتقان اۋىر اتلەتيكادان جاس وسپىرىمدەر اراسىنداعى ازيا چەمپيوناتىندا قازاقستان قورجىنىنا العاشقى التىن جۇلدە ءتۇستى، دەپ حابارلايدى Olympic.kz.
96 كەلىگە دەيىنگى سالماقتا سىنعا تۇسكەن بەكبولات راحات 17 جاسقا دەيىنگى سپورتشىلار اراسىندا ازيا چەمپيونى اتاندى. ول قوسسايىس قورىتىندىسى بويىنشا 352 كەلىنى (156+196) باعىندىردى.
سونداي-اق، 15 جاستاعى قىزىلوردالىق اتلەت سەرپە كوتەرۋدەن جاڭا الەم رەكوردىن ورناتتى. ودان بولەك، بەكبولات 20 جاسقا دەيىنگى سپورتشىلار اراسىندا كۇمىس جۇلدەگەر اتاندى.
بيىلعى ماۋسىم بەكبولات ءۇشىن ءساتتى وتۋدە. ول لاس-ۆەگاستا وتكەن جاس وسپىرىمدەر اراسىنداعى الەم چەمپيوناتىن، سونىمەن قاتار، قۇرلىق بىرىنشىلىگىن جەڭىسپەن اياقتاپ وتىر. وسى سالماقتا باق سىناعان ارتەم انتروپوۆ قولا جۇلدەگەر اتاندى.
