ترامپ تۇركياعا قارسى سانكسيانى الىپ تاستادى
انكارا. انادولۋ-قازاقپارات – ا ق ش پرەزيدەنتى دونالد ترامپ تۇركيا قارۋلى كۇشتەرىنىڭ «بەيبىتشىلىك كوزى» كونترتەرروريستىك وپەراتسيالارىنا بايلانىستى انكاراعا ەنگىزىلگەن سانكسيانى توقتاتۋدى بۇيىردى، دەپ حابارلايدى قازاقپارات «انادولۋ» اگەنتتىگىنە سىلتەمە جاساپ.
«مەن قارجى مينيسترلىگىنە 14- قازاندا تۇركياعا قاتىستى ەنگىزىلگەن سانكسيانىڭ كۇشىن جويۋدى تاپسىردىم»، - دەدى امەريكا كوشباسشىسى.
اق ءۇي باسشىسى كەلىسىم جۇرگىزىلگەننەن كەيىن تۇركيانىڭ «بەيبىتشىلىك كوزى» وپەراتسياسىن توقتاتقانىن اتاپ ءوتتى. ا ق ش پرەزيدەنتى سيريا-تۇركيا شەكاراسىندا وق اتۋ توقتاتىلىپ، جاعدايدىڭ تۇراقتالعانىن ءمالىم ەتتى.
«قاشىقتىعى 20 ميل (32 شاقىرىم) بولاتىن قاۋىپسىزدىك ايماعى قۇرىلدى»، - دەدى ول.
ا ق ش قارجى مينيسترلىگى تۇركيانىڭ ەكى مينيسترلىگى مەن ءۇش مينيسترىنە قاتىستى سانكسيالاردىڭ رەسمي جويىلعانىن مالىمدەدى. بۇل تۋرالى امەريكا قارجى ۆەدومستۆوسىنىڭ جاريالاعان پرەسس-رەليزىندە ايتىلعان.
شەكتەۋ شارالارى وسى جىلدىڭ 14- قازانىندا تۇركيا ق ك سيريانىڭ سولتۇستىگىندە «بەيبىتشىلىك كوزى» كونترتەرروريستىك وپەراتسيالارىن جۇرگىزۋىنە بايلانىستى ەنگىزىلگەن ەدى.
