تاجىكستان قىتاي كومپانياسىن سالىقتان بوساتتى

دۋشانبە ءوزىنىڭ جەر قويناۋىن ينۆەستيتسياعا ايىرباس جانە قىتاي الدىنداعى قارىزىنىڭ وتەۋى رەتىندە قىتاي كومپانيالارىنىڭ باقىلاۋىنا بەرەتىنى بايقالعان. «دۋشانبە-2» جىلۋ ەلەكتر ستانتسياسىن سالۋ ءۇشىن التىن كەنىشىن بەرۋگە ءماجبۇر بولعان ەدى.

بيلىكتىڭ بۇل ارەكەتىن سىناۋشىلار وندىرىلگەن رۋدا تاجىكستاننان تەك شيكىزات كۇيىندە شىعارىلاتىنىن العا تارتقان. الايدا تاجىك بيلىگى «كەنىشتەر سىيعا بەرىلگەن جوق جانە ول تاجىكستاننىڭ تابيعي رەسۋرستارىن ساتۋ بولىپ تا ەسەپتەلمەيدى، بۇل - ينۆەستيتسيا تارتۋدىڭ جاڭا ءتۇرى» دەپ تۇسىندىرەدى.

كەلىسىمشارت بويىنشا، قىتايدىڭ تۆەا كومپانياسى «دۋشانبە-2» جىلۋ ەلەكتر ستانتسياسىن سالۋ ءۇشىن جۇمسالعان قارجىسى وتەلگەنشە شىعىس دۋوبا جانە جوعارعى كۋمارگ التىن كەنىشتەرىن التىن ءوندىرۋ قۇقىعىن يەلەنگەن. بۇل نىسانداردىڭ جالپى قۇنى - 349 ميلليون دوللار، ونىڭ 17,4 ميلليونى تاجىك ۇكىمەتىنە تيەسىلى.

تاجىك ۇكىمەتى تۆەا جىلۋ ەلەكتر ستانتسياسىنا جۇمساعان شىعىنىن قايتارىپ العان سوڭ قالعان رۋدا رەسپۋبليكا پايداسىنا جۇمسالادى دەپ سانايدى. الايدا تۆەا باسشىسى چجان سيننىڭ قىتايدىڭ stcn.com ۆەب-سايتىنا بەرگەن اقپاراتىندا «ەگەر كومپانيا ەكى كەنىشتەن شىعىنىن قايتارا الماسا، تاجىكستان ۇكىمەتى وزگە كەنىشتەرىن بەرۋگە مىندەتتى» دەپ سانايتىنىن بىلدىرگەن.

تاجىكستاننىڭ قىتاي ينۆەستورلارىنا بەرگەن كەنىشتەرى جوعارعى كۋمارگ جانە شىعىس دۋوبا عانا ەمەس. تاجىكستاندا وندىرىلەتىن التىننىڭ 80 پايىزدان استامىن تاجىكستان مەن قىتايدىڭ بىرلەسكەن كومپانيالارى شىعارادى.

«ازاتتىق»