سيريادان ورالعان شىنار باسىنان وتكەندەرى تۋرالى كىتاپ جازباقشى

الماتى. قازاقپارات- «جۋسان» وپەراتسياسى بويىنشا سيريادان ورالعان وتانداستارىمىزدىڭ قاتارىندا شىمكەنتتىك شىنار دا بار.

بەس جىلداي بەرەكەسى قاشقان بوتەن ەلدە ءومىر سۇرگەن ول، باستان كەشكەندەرىن بۇكپەسىز بايانداپ بەردى.

شىنار شام ولكەسىنەن كەلگەن ايەلدەردىڭ ءبىرى. ءوز ەلىنەن بەزىپ، وزەگى ورتەنگەن كەلىنشەكتىڭ تاعدىرى اۋىر. سوڭعى بەس جىلى شىم-شىتىرىق وقيعاعا تولى. قاندى قىرعىندى كوزبەن كورىپ، زۇلىمدىقتان ابدەن قاجىعان.

«كۇندىز-ءتۇنى بومبىلايدى. تاس تالقانىن شىعارادى. سول ەلدى مەكەندى جەرمەن جەكسەن ەتكەنشە بومبىلايدى. سوسىن ءبىز قاشىپ باسقا اۋدانعا، باسقا قالاعا كوشەمىز. كوشپەلى ءومىر بولدى. كوز الدىمىزدا ادامدار ءولىپ جاتتى. جانىڭ اشيدى، كومەكتەسكىڭ كەلەدى. ءبىراق امالىڭ جوق. تاستاپ كەتۋگە ءماجبۇرسىڭ ءوز باسىڭدى امان الىپ قالۋ ءۇشىن»، - دەيدى شىنار.

شىنار 2015 -جىلى جولداسىمەن بىرگە ەڭ الدىمەن تۇركياعا كەلەدى، كەيىن كۇيەۋىمەن سيرياعا اتتانادى. 31 جاستاعى كەلىنشەكتىڭ جاناتتى اڭساعان جولداسى يسلام مەملەكەتىندە جايما-شۋاق ءومىر سۇرەمىز دەپ سەندىرىپتى. ءبىراق، سيرياداعى سۇمدىقتى كورگەندە، توزاققا تاپ بولعانىن تۇسىنەدى.

«مەن شاريعات زاڭى ورىن العان جەرگە بارام، سەنىڭ قالاۋىڭ وزىڭدە. بارساڭ ءجۇر، بارماساڭ قال، ءبىراق مەن بالالارىمدى الىپ كەتەم»، دەپ ايتتى. ونى ويىنان قايتاراتىن ءبىلىمىم بولمادى. شامام جەتپەدى. شاراسىز كۇيگە ءتۇستىم. بالالارىم ءۇشىن بارۋىما تۋرا كەلدى»، - دەيدى كەلىنشەك.

كۇيەۋى العاشقى جىلى-اق مەرت بولادى. تاۋى شاعىلىپ ءتورت بالامەن دالادا قالعان شىنار تاعى دا تۇرمىس قۇرادى. ءسابي سۇيەدى. ءبىراق ول كۇيەۋىمەن ءدام تۇزى جاراسپاي اجىراسىپ تىنادى.

كەلىنشەكتىڭ ايتۋىنشا، سيريادا كۇيەۋسىز جۇرگىزىپ قويمايدى. سوندىقتان كەلىنشەكتەر بىرنەشە رەت تۇرمىسقا شىعۋعا ءماجبۇر. بۇگىندە وڭتۇستىك قازاقستاننىڭ تۋماسى شىرعالاڭنان بەس بالاسىمەن امان-ەسەن شىعىپ، بەيبىت ەلدە جۇرگەنىنە قۋانادى.

«ءبىزدىڭ سوڭعى ءبىر ايدا سيريادا كورگەندەرىمىزدى ەشكىمنىڭ باسىنا بەرمەسىن. نەبىر سۇمدىق ارەكەتتەردىڭ كۋاسى بولدىق. مەن ول جاقتا كۇندىز ءتۇنى قۇدايدان كەشىرىم سۇراپ، قازاقستانعا امان-ەسەن ورالۋىمدى سۇرايتىنمىن. اللاعا شۇكىر دۇعالارىم قابىل بولىپ ەلگە ورالدىق. اللاعا سانسىز شۇكىر دەيمىن. «جۋسان» بىزگە تاعى ءبىر ءومىر سىيلادى»، - دەيدى شىنار.

قازىر كەلىنشەك بەس بالاسىمەن وڭالتۋ شارالارىنان ءوتىپ جاتىر. بار ارمانى بالالارىنىڭ بويىنداعى ۇرەي مەن قورقىنىش تەزىرەك سەيىلىپ، ۇمىت بولسا ەكەن دەيدى.

«جۇرەگىم كىشكەنە تىنىشتالدى. الداعى ۋاقىتتا كىتاپ جازۋدى جوسپارلاپ وتىرمىن. مەن كوزىمەن كورگەن نارسەلەرىمدى قاعاز بەتىنە تۇسىرگىم كەلەدى. سونى جاستار وقىپ، بىلسە ەكەن دەيمىن. جات اعىمداعىلار ولاردى ەشقاشان ۇجماققا شىعارمايدى. كەرىسىنشە ومىرلەرىن توزاققا اينالدىرادى»، - دەپ شىنار اڭگىمەسىن قورتىندىلادى.

«جۋسان» وپەراتسياسى شىنار سياقتى قازاقستاندىق ونداعان كەلىنشەككە قايتا ءومىر سىيلادى. ولار ويلانباي وت باسقاندارىن سيرياعا بارعان كەزدە ۇقتى. ەلىمىزدە وڭالتۋ شارالارىنان ءوتىپ، كوپتەگەن مامانداردان كەڭەس الىپ جاتقان وتانداستارمىز قازىر وكىنەدى. قازىرگى ارماندارى ءبىر. ءوز ەلدەرىندە باقىتتى عۇمىر كەشۋ.

اۆتور: الما مۇقانوۆا